Мирзиёев Словакияга боради

Ўзбекистон Президенти Шавкат Мирзиёев Словакияга боради. Бу ҳақда Словакия Президенти Петер Пеллегрини бугун, 31 октябрь куни Самарқандда ўтаётган UNESCO Бош конференциясининг 43-сессиясининг 2-кунида QALAMPIR.UZ'га берган интервьюсида маълум қилди.

Кеча, 30 октябрь куни Ўзбекистон Президенти Шавкат Мирзиёев ва Словакия Президенти Петер Пеллегрини музокара ўтказганди. Суҳбат давомида Ўзбекистон Президентининг Словакияга ташрифи режа қилинган.

“Ташрифим икки томонлама характерга ҳам эга эди, чунки кеча мен Ўзбекистон Президенти билан учрашдим. Биз икки томонлама музокаралар ўтказдик ва бир неча ой аввал Ўзбекистонга ташриф буюрган Словакия Бош вазирининг ташрифини давом эттирдик”, деди Президент Пеллегрини.

Шунингдек, у ўзбекистонлик мавқедоши билан ўзаро яхши муносабатларни тасдиқлагани, иқтисодий, хўжалик ва маданий ҳамкорлик имкониятлари ҳақида суҳбатлашганини маълум қилди. 

“Энг муҳими, Президент жаноблари билан келишдикки, эндиликда вазирлар даражасида алмашинувлар бўлади ва биргаликдаги лойиҳалар тайёрланади. Шу соҳаларда биз ҳамкорликни янада ривожлантиришни режалаштирмоқдамиз.

Шунингдек, Ўзбекистон Президенти кейинчалик Словакия Республикасига ташриф буюриб, вазирлар билан биргаликда қўшимча келишувларни имзолаши режалаштирилган”, деди Словакия Президенти.

Ўзбекистон Президенти матбуот хизматининг маълум қилишича, Ўзбекистондан тўқимачилик, чарм, мева-сабзавот ва бошқа харидоргир маҳсулотлар, Словакиядан каучук, автомобиллар учун бутловчи қисмлар, фармацевтика ва бошқа саноат товарлари етказиб беришни кўпайтиришга келишиб олинган. Шу мақсадда, миллий маҳсулотлар кўргазмаларини ўтказиш, савдо уйларини очиш режалаштирилган.

Эслатиб ўтамиз, жорий йилнинг 8-10 июнь кунлари Словакия Республикаси Бош вазири Роберт Фицо Ўзбекистонда бўлганди. У ташрифи давомида  IV Тошкент халқаро инвестиция форумида ҳам иштирок этди, Ўзбекистон Президент Шавкат Мирзиёев билан бирга футбол бўйича Ўзбекистон миллий терма жамоасининг Қатар миллий терма жамоасига қарши баҳсини стадиондан томоша қилди.