Мирзиёев Вучични тантанали тарзда кутиб олди

Бугун, 28 октябрь куни Кўксарой қароргоҳида Ўзбекистонга расмий ташриф билан келган Сербия Республикаси Президенти Александр Вучични расмий кутиб олиш маросими ўтказилди. Бу ҳақда Ўзбекистон Президенти матбуот хизмати хабар берди.

Қайд этилишича, Ўзбекистон Республикаси Президенти Шавкат Мирзиёев олий мартабали меҳмонни самимий қарши олиб, шоҳсупага таклиф этган.

Икки давлат мадҳиялари янграган. Ҳарбий оркестр садолари остида етакчилар фахрий қоровул сафи олдидан ўтган. Расмий делегациялар аъзоларини қутлаган.

Биргаликда суратга тушилганидан сўнг давлат раҳбарларининг делегациялар иштирокидаги музокаралари бошланган.

Эслатиб ўтамиз, аввалроқ Шавкат Мирзиёевнинг таклифига биноан, Александр Вучич рафиқаси ҳамроҳлигида расмий ташриф билан Ўзбекистонга келгани ҳақида хабар берилганди. Ташриф дастурига мувофиқ, Тошкент шаҳрида музокаралар ўтказилади, уларда Ўзбекистон – Сербия ҳамкорлигини янада ривожлантиришнинг истиқболлари муҳокама қилинади. Шунингдек, Александр Вучич фахрий меҳмон сифатида шу ҳафта Самарқанд шаҳрида бошланадиган UNESCO Бош конференциясининг 43-сессиясида ҳам иштирок этади.