Афсус! Муроджон Аҳмадалиев Иноуэга қарши жангда ютқазди

Бугун, 14 сентябрь куни япониялик боксчи, мутлақ жаҳон чемпиони Наоя Иноуэ Япониянинг Нагоя шаҳридаги IG Аренада чемпионлик унвонини ўзбекистонлик боксчи Муроджон Аҳмадалиевга қарши жангда ҳимоя қилиш учун рингга кўтарилди.

Жангда Наоя Иноуэ эгалик қилиб келаётган Ring Magazine, WBC, WBA, WBO ва IBF камарлари ўртага қўйилди. Жанг анча қизғин кечди. Наоя Иноуэ Аҳмадалиевга ўз чемпионлик камарларини бериб қўймаслик учун ҳам анча тер тўкди. Аҳмадалиев эса ўзининг аниқ зарбаларини йўллай олди. Аммо шу билан бир қаторда, Иноуэ томонидан йўлланган зарбаларни ҳам ўтказиб юборди. Жангда ҳакамларнинг якуний қарорига кўра, Муроджон Аҳмадалиев мағлубиятга учради.  

Иноуэ ва Аҳмадалиев жанги учун умумий гонорар тахминан 20 миллион доллар этиб белгиланган эди, бу ерда Иноуэ “А томони” сифатида 75/25 нисбатда тақсимотдан фойдаланди. У ўз фаолиятидаги энг катта гонорарини – 15 миллион долларни қўлга киритди. 

Муроджон Аҳмадалиев эса жангда даъвогар ва “B томони” ҳисобланади. У Иноуэга қарши жангдан 5 миллион доллардан кўпроқ маблағ олди. Бу унинг фаолиятидаги энг катта гонорари бўлди, чунки у илгари ҳеч қачон 1 миллион доллардан ортиқ пул олмаган.

Эслатиб ўтамиз, аввалроқ АҚШнинг Лас-Вегас шаҳрида профессионал бокснинг катта кечаси бўлиб ўтганди. Енгил, ярим ўрта вазн, ярим-ўрта ва ўрта вазн тоифаларида қатнашадиган америкалик енгилмас профессионал боксчи Теренс Кроуфорд иккинчи ўрта вазн тоифасида мексикалик боксчи Сауль Альваресга қарши рингга кўтарилди. Олдинроқ Мадримовни енгган Кроуфорд бу галги жангда ҳам ғалаба қозониб, ҳакамларнинг якуний қарорига кўра, (116-112, 115-113, 115-113), WBC, WBA, WBO, IBF ва The Ring камарларини қўлга киритди.