НАТОнинг собиқ бош котиби АҚШсиз иттифоқ тузишни таклиф қилди

НАТОнинг собиқ бош котиби Андерс Фог Расмуссен АҚШ иштирокисиз демократик давлатларнинг янги бирлашмасини тузишга чақирди. Унинг билдиришича, АҚШ Президенти Дональд Трамп даврида Вашингтон Ғарбнинг ишончли етакчиси ролини йўқотган. Бу ҳақда у “Presseportal”га берган интервьюсида сўз очди.

Унинг сўзларига кўра, иттифоқ G7 (Катта еттилик) аналоги сифатида D7 номини олиши мумкин, бу ердаги “D” ҳарфи “демократия”ни англатади. Ушбу бирлашмага Европа Иттифоқи давлатлари, Буюк Британия, Канада, Япония, шунингдек, Австралия, Янги Зеландия ва Жанубий Кореяни киритиш таклиф этилмоқда.

Андерс Фог Расмуссен бундай бирлашма ичида иштирокчилар ўртасидаги таҳдидларга йўл қўйиб бўлмаслигини таъкидлаган. У буни Гренландия атрофидаги баҳслар фонида АҚШнинг Данияга нисбатан ҳаракатлари билан боғлаган ва бундай сиёсат демократик мамлакатлар ўртасидаги ишончга путур етказишини ҳамда автократиялар манфаатига хизмат қилишини қайд этган.

НАТО собиқ бош котибининг фикрича, ҳамкорликнинг янги формати демократик давлатларга ўсиб бораётган геосиёсий кескинлик шароитида саъй-ҳаракатларни мувофиқлаштириш ва жаҳон саҳнасидаги мавқеини мустаҳкамлаш имконини беради.

Маълумот учун, Андерс Фог Расмуссен 2009–2014 йилларда НАТО бош котиби лавозимида ишлаган, унгача эса Дания Бош вазири бўлган.