Непалда зумерлар ўзига янги етакчи танлади

Бугун, 12 сентябрь куни Непал Президенти Рам Чандра Паудел мамлакат Вакиллар палатасини тарқатиб юборишга ва муваққат ҳукумат раҳбари этиб Олий суднинг собиқ раиси Сушила Каркини тайинлашга рози бўлди. Бу ҳақда “Himalayan Times” ва “Khabarhub” хабар берди. Шунингдек, ушбу маълумотни давлат раҳбарининг жамоатчилик билан алоқалар бўйича маслаҳатчиси Киран Похрел тасдиқлаган.

“Khabarhub”нинг манбаларига кўра, Паудел жамоатчилик босимига ён берган. Ҳозирда ушбу қадамларни қонунийлаштирувчи ҳужжатлар тайёрланмоқда. Похрелнинг аниқлик киритишича, Карки бугун, 12 сентябрь оқшомидаёқ қасамёд қилиши мумкин.

“Himalayan Times”нинг ёзишича, Президентнинг қарори парламентни тарқатишни (Вакиллар палатаси – қуйи палата, юқори палата эса Миллий мажлис ҳисобланади) ва партиясиз вақтинчалик ҳукумат тузишни талаб қилаётган “зумерлар инқилоби” иштирокчилари талаблари билан мос келади.

“Khabarhub” нашрига кўра, ёшлар Каркини ўтиш даврида мамлакатни бошқариш учун энг муносиб номзод деб ҳисобламоқда. “Reuters”нинг манбаси ҳам “Z-авлод” бош вазир сифатида айнан Каркини кўришни исташини билдирган.

Маълумот учун, 73 ёшли Карки 2016-2017 йилларда Олий судга раислик қилган, суд тизимида эса 2010 йилдан бери ишлаган. Унгача у адвокат, ундан аввал эса ўқитувчи бўлган. У Непалда Олий судга раислик қилган илк аёл ҳисобланади. Карки мамлакатда коррупцияга қарши курашувчи фаол сифатида, шунингдек, ҳалоллиги ва поклиги билан танилган.

Қайд этиш жоиз, Непал ҳукумати жорий йилнинг 4 сентябрь куни айрим мессенжерлар ва ижтимоий тармоқлар фаолиятига чеклов жорий қилган эди. 8 сентябрь куни Катманду ва бошқа йирик шаҳарларда минглаб намойишчилар ҳукумат чораларига қарши оммавий норозилик намойишларига чиқди. 9 сентябрь куни норозиликлар фонида ҳукумат ижтимоий тармоқлар фаолиятига қўйилган тақиқни олиб ташлади.

Намойишлар расмий етакчиларсиз ўтгани билан, уларнинг юзи “Биз Непал учун” ёшлар нодавлат ташкилоти раиси Судан Гурунг бўлди. Мазкур ташкилот ёшларнинг жамиятни ўзгартиришдаги фаол иштирокини қўллаб-қувватлайди, интернетда цензура ва коррупцияга қарши чиқади.

Маълумот ўрнида, Непал – Жанубий Осиёда жойлашган, аҳолиси 30 миллионга яқин кичик давлат бўлиб, Ҳимолай тоғ тизмалари бағрида жойлашган. Мамлакат иқтисодиёти асосан қишлоқ хўжалиги, туризм ва чет элда ишлаётган фуқароларнинг пул ўтказмаларига таянади, ривожланиши секин кечмоқда. Мамлакат иш ўринлари етишмовчилиги, Ҳиндистон ва Хитойга савдода қарамлик каби муаммоларга дуч келмоқда. Кўпинча Непал иқтисодиёти зилзилалар, сув тошқинлари каби табиий офатлардан зарар кўради.

Эслатиб ўтамиз, аввалроқ Непал армияси “Z-авлод” намойишчилари билан янги вақтинчалик етакчини тайинлаш масаласида музокаралар ўтказаётгани хабар қилинганди.