Непалдаги тартибсизликлар қурбонлари 25 нафарга етди

Непалда оммавий тартибсизликлар чоғида ҳалок бўлганлар сони 25 нафарга етди, 633 киши яраланди. Бу ҳақда бугун, 10 сентябрь куни мамлакат Соғлиқни сақлаш вазирлигига таяниб, “Reuters” хабар берди.

Жорий йилнинг 8 ва 9 сентябрь кунлари Катманду ва бошқа шаҳарларда коррупция ҳамда ижтимоий тармоқлар тақиқига қарши намойишлардан кейин тартибсизликлар юз берди. Мамлакат бош вазири Шарма Оли истеъфога чиқди. Намойишчилар давлат идоралари биноларини, жумладан парламент, Олий суд, прокуратура биноларини ёқиб юборди, сиёсатчилар ва амалдорларнинг уйларига ҳужум қилди. Оқибатда Непал собиқ бош вазири Жана Натха Кҳаналанинг рафиқаси ҳалок бўлди. Тартибсизликлар Непал ва Ҳиндистон чегарасида ҳам юзага келиб, назорат-ўтказиш пунктлари ёпилди.

Непал ҳукумати жорий йилнинг 4 сентябрь куни айрим мессенжерлар ва ижтимоий тармоқлар фаолиятига чеклов жорий қилган эди. 8 сентябрь куни Катманду ва бошқа йирик шаҳарларда минглаб намойишчилар ҳукумат чораларига қарши оммавий норозилик намойишларига чиқди. 9 сентябрь куни норозиликлар фонида ҳукумат ижтимоий тармоқлар фаолиятига қўйилган тақиқни олиб ташлади.

Намойишлар расмий етакчиларсиз ўтгани билан, уларнинг юзи “Биз Непал учун” ёшлар нодавлат ташкилоти раиси Судан Гурунг бўлди. Мазкур ташкилот ёшларнинг жамиятни ўзгартиришдаги фаол иштирокини қўллаб-қувватлайди, интернетда цензура ва коррупцияга қарши чиқади.

Маълумот учун, Непал – Жанубий Осиёда жойлашган, аҳолиси 30 миллионга яқин кичик давлат бўлиб, Ҳимолай тоғ тизмалари бағрида жойлашган. Мамлакат иқтисодиёти асосан қишлоқ хўжалиги, туризм ва чет элда ишлаётган фуқароларнинг пул ўтказмаларига таянади, ривожланиши секин кечмоқда. Мамлакат иш ўринлари етишмовчилиги, Ҳиндистон ва Хитойга савдода қарамлик каби муаммоларга дуч келмоқда. Кўпинча Непал иқтисодиёти зилзилалар, сув тошқинлари каби табиий офатлардан зарар кўради.

Эслатиб ўтамиз, аввалроқ Непал жанубида Ҳиндистон билан чегарага яқин жойлашган Навалпараси тумани ғарбий қисмидаги қамоқхонадан мамлакатдаги оммавий тартибсизликлар фонида 500 дан ортиқ маҳбус қочиб кетган ҳақида хабар берилганди.