Нетаньяху Эрон олий раҳбарини ўлдириш билан таҳдид қилди

Исроил Бош вазири Биньямин Нетаньяху Эроннинг янги олий раҳбари Мужтабо Хоманаийни ўлдириш билан таҳдид қилди. Бу ҳақда “Reuters” хабар берди.

Нетаньяху Эрон билан уруш бошланганидан бери илк бор матбуот анжумани ўтказиб, Эрон “энди аввалгидек эмас”лигини айтиб, Ислом инқилоби қўриқчилари корпуси ҳамда Басиж яримҳарбий кучларига зарба берилганини таъкидлади.

Исроил Бош вазири урушга қўшилган Ливандаги “Ҳизбуллоҳ” гуруҳи нишонларига қарши ҳужумлар давом этишини ҳам маълум қилди. Маълумотларга кўра, Эроннинг олий раҳбари Оятуллоҳ Али Хоманаий 28 февраль куни ҳаво ҳужумлари оқибатида ҳалок бўлган. Шундан сўнг 2 март куни “Ҳизбуллоҳ” Исроилга қарши ҳужумларни бошлаган ва буни Хоманаий ўлими учун қасос деб атаган.

Али Хоманаий вафотидан кейин Эроннинг янги олий раҳбари этиб унинг ўғли Мужтаба Хоманаий тайинланган.

Матбуот анжуманида Нетаньяхудан Мужтаба Хоманаий ва “Ҳизбуллоҳ” етакчисига қарши қандай чоралар кўрилиши сўралди. У аниқ режаларни очиқламаслигини билдирди.

“Мен террорчи ташкилот раҳбарларидан бирортасига ҳам ҳаёт суғуртаси полисини бермаган бўлардим... Бу ерда нималарни режалаштираётганимиз ёки нима қилмоқчи эканимиз ҳақида аниқ ҳисобот бериш ниятим йўқ”, деган Бош вазир.

Исроил Эронга қарши ҳужумларнинг мақсади Теҳроннинг ядровий ва баллистик ракета дастурларидан келиб чиқаётган “экзистенциал таҳдидни бартараф этиш” эканини таъкидламоқда.

Шунингдек, Нетаньяху Эрон халқини ҳукуматга қарши қўзғолонга чақирди. Бироқ, уруш бошланганидан буён мамлакатда ҳукуматга қарши йирик норозилик намойишлари кузатилгани йўқ. Нетаньяху эса ҳукумат ағдарилмаса ҳам, унинг заифлашганини билдирган.

Эслатиб ўтамиз, аввалроқ Исроил Бош вазири Биньямин Нетаньяху АҚШ Президенти Дональд Трамп билан биргаликда “ёмон йигитлар”га қарши курашаётганини, уларнинг ўзлари эса “яхши йигитлар” эканини айтганди.