Олтин нархи жаҳон бозорида рекорд даражада қимматлади

2025 йилнинг 6 октябрь куни олтин нархи тарихдаги энг юқори кўрсаткичга етиб, биринчи марта 4000 доллардан ошди. Бу ҳақда “The New York Times” нашри хабар берди.

Қайд этилишича, бир йил ичида унция (31,1 грамм) олтин нархи қарийб 50 фоизга ошган. Бу тарихдаги энг юқори кўрсаткичлардан бири бўлган. Нью-Йорк фонд биржасида савдо бошланганда унция олтиннинг баҳоси 3 886 долларни ташкил этган. Куннинг энг юқори нуқтасида эса нарх 3 969 долларгача кўтарилган. Кечқурунга келиб, нарх 3 960 доллар атрофида бўлган.

Олтин нархининг бундай ўсишига бир нечта омиллар таъсир қилган. Аввало, 1 октябрда АҚШ ҳукуматининг вақтинча ишини тўхтатиши, яъни “шатдаун” ҳолати — инвесторлар орасида хавотир уйғотган. Натижада кўпчилик пулларини хавфсиз актив ҳисобланган олтинга йўналтирган.

Шунингдек, 2025 йил бошидан бери геосиёсий ва иқтисодий беқарорлик давом этмоқда. “Bloomberg” агентлигига кўра, йил бошида унция олтин нархи 2 623 доллар бўлган, ҳозир эса бу кўрсаткич деярли 4 минг долларга етган. Бундан ташқари, АҚШ Федерал захира тизими сентябрь ойида кредит фоиз ставкасини 9 ой ичида илк бор пасайтирган. Бу ҳам олтинга бўлган талабни кучайтирган.

“Deutsche Bank” мутахассисларининг башоратига кўра, агар бу тенденция сақланиб қолса, 2026 йилда унция олтин нархи 4 минг доллардан ҳам ошиб кетиши мумкин. Бунинг сабаби — марказий банклар томонидан юқори талаб, долларнинг заифлашиши ва Федерал захира тизими ставкаларининг яна пасайиши бўлиши мумкин.

Эслатиб ўтамиз, жорий йилнинг январь-август ойларида Ўзбекистон 8,42 млрд долларлик олтин экспорт қилиб, олтин сотиш бўйича рекордни янгилаганди.