“Opta” Ўзбекистоннинг плей-оффга чиқиш эҳтимолини ўрганиб чиқди

Колумбияга қарши учрашувдан сўнг “Opta” аналитика компаниясининг суперкомпьютери Ўзбекистоннинг 2026 йилги Жаҳон чемпионати плей-оффига чиқиш эҳтимолини ўрганиб чиқди. Бу ҳақда компаниянинг расмий сайтида маълум қилинди. 

Янгиланган прогнозга кўра, Ўзбекистон терма жамоасининг ўз гуруҳида биринчи ўринни эгаллаш эҳтимоли 0,99 фоизни ташкил этмоқда. Терма жамоанинг плей-офф босқичига чиқиш имконияти эса 21,90 фоиз деб баҳоланган.

“Opta” ҳисоб-китобларига кўра, Ўзбекистоннинг 1/32 финалга чиқиш эҳтимоли 21,90 фоиз, нимчорак финалга етиб бориш имконияти 4,55 фоизга тенг. Шунингдек, жамоанинг чорак финалга чиқиш эҳтимоли 1,26 фоиз, ярим финалга йўл олиши 0,33 фоиз ва финалга чиқиши 0,08 фоиз деб баҳоланган.

Суперкомпьютер прогнозида Ўзбекистоннинг жаҳон чемпиони бўлиш эҳтимоли – 0,01 фоизни ташкил этган.

Ҳисоб-китобларга кўра, Франция терма жамоасини Жаҳон чемпионатининг асосий фаворити деб баҳоламоқда. Французлар 10 минг марта ўтказилган турнир симуляциясининг 15,73 фоизида чемпион бўлган. Турнир бошланишидан олдин “Opta” Испанияни асосий фаворит сифатида кўрсатган эди. Унинг чемпионлик эҳтимоли – 16,1 фоиз деб баҳоланган. Бироқ испанлар 1-турдаги мағлубиятдан сўнг 12,08 фоиз кўрсаткич билан тўртинчи ўринга тушиб қолган.

Англия терма жамоаси чемпионлик учун 12,33 фоиз эҳтимол билан иккинчи ўринни эгаллаб турибди. Амалдаги жаҳон чемпиони Аргентинанинг кубокни қўлга киритиш имконияти эса 12,28 фоизга тенг.

Элатиб ўтамиз, Фабио Каннаваро бошчилигидаги Ўзбекистон терма жамоаси Жаҳон чемпионатидаги илк учрашувида Колумбияга 1:3 ҳисобида мағлуб бўлди.