Поль Погба ва 70 дан ортиқ спортчи UEFA’дан Исроилни четлатишни талаб қилди – ОАВ

70 дан ортиқ спортчи, жумладан Франция терма жамоасининг собиқ футболчиси Поль Погба ва “Фулхэм” ярим ҳимоячиси Адама Траоре Европа футбол ассоциациялари иттифоқи (UEFA)дан Исроилни футболдан четлаштиришни талаб қилмоқда. Бу ҳақда UNB нашри хабар берди.

Спортчилар томонидан имзоланган мурожаат хати UEFA президенти Александер Чеферинга топширилган. Мактубда улар Европа бошқарув органини “Исроилнинг Европа футболида иштирокини тўхтатиш бўйича ҳеч қандай маънавий чоралар кўрмагани” учун танқид қилган.

“Футбол геноцид ва инсониятга қарши жиноятлар содир этаётган режимни олқишлаш учун майдон бўлмаслиги керак”,  дейилади спортчилар имзолаган мактубда.

Athletes 4 Peace ташкилоти ташаббуси билан ёзилган мактубни Погба ва Траоре билан бир қаторда инглиз мураббийи Найжел Пирсон, шунингдек, “Game Over Israel” каби кампаниялар вакиллари ҳам имзолаган.

Мактуб UEFA президенти Александер Чеферинга юборилган бўлиб, у ерда “Game Over Israel” кампанияси вакиллари UEFA’ни сиёсий босимлардан ҳоли қарор қабул қилишга чақирган.

Ташаббус Ирландия футбол ассоциацияси UEFA’га Исроилни четлатиш бўйича таклиф киритганидан ва Туркия футбол федерацияси шунга ўхшаш чақириқ билан чиққанидан сўнг бошланди.

Эслатиб ўтамиз, аввалроқ Индонезия ҳукумати исроиллик спортчиларга Жакартада бўлиб ўтадиган гимнастика бўйича Жаҳон чемпионатида иштирок этиш учун виза беришдан бош тортган эди.