Польшада Киев талаби билан россиялик олим қўлга олинди

Польша Ички хавфсизлик агентлиги ходимлари Санкт-Петербург Эрмитажи илмий ходими Александр Бутягинни ҳибсга олди. У 1999 йилдан бери Қримда археологик қазишмалар экспедициясига раҳбарлик қилиб келаётган эди. Бу ҳақда бугун, 11 декабрь куни ҳукумат маълумотларига таяниб, Польша радиоси “RMF FM” хабар берди.

Маълум қилинишича, олим Европада бир қатор маърузалар ўтказган, Варшавага эса Нидерландиядан Болқон томон йўл олган пайтида келган. Варшава прокуратурасида сўроқ қилинганидан кейин Польша суди Россия фуқаросини 40 кунга вақтинча қамоққа олишга қарор қилган. Киев Бутягинни экстрадиция қилишга интилади.

Украинада Бутягин маданий мерос объектларида ноқонуний қазишмалар ўтказиш ва уларни 200 миллион гривнадан (4 миллион еврога яқин) зиёд зарар етказган ҳолда вайрон қилишда гумонланмоқда. Тергов версиясига кўра, Қрим аннексия қилинганидан кейин Бутягин Эрмитажнинг Мирмекий археологик экспедицияси раҳбари сифатида Украина ҳокимиятидан ҳеч қандай рухсатларсиз Керчдаги “Қадимги Мирмекий шаҳри” маданий мерос объектида ноқонуний қазишмалар ўтказган.

Россия ҳокимияти 11 декабрь куни Украина талаби билан Александр Бутягиннинг Польшада қўлга олиниши ортидан Варшавани “ҳуқуқий тирания”да айблади. 

“Бу мутлақ ҳуқуқий тирания”, деди Кремль матбуот котиби Дмитрий Песков.

Россия ТИВ расмий вакили Мария Захарованинг таъкидлашича, Эрмитаж ходимини қўлга олиш қарори Украина чиқарган халқаро ҳибс ордерига асосланган. 

“Россиянинг Варшавадаги элчихонаси ходимлари Александр Бутягин билан учрашди ва унинг адвокати билан алоқада бўлиб турибди. Адвокат суднинг вақтинчалик ҳибс қарори устидан шикоят киритмоқда”, деди Захарова россиялик журналистларга.