Пранк тақиқланиши мумкин. Қозоғистонда!

Қозоғистонда пранк қилиш тақиқланиши мумкин. Бу ҳақда бугун, 20 ноябрь куни мамлакат Маданият ва ахборот вазири Аида Балаева Сенат мажлисида сўз очди.

“Алоҳида суратга олиш ҳолатлари бор, улар ,муайян шахсларнинг рухсатисиз амалга оширилади. Шунинг учун бу нормани, албатта, сиз билан биргаликда муҳокама қиламиз, чунки ишчи гуруҳ энди тузилмоқда.

Агар хоҳласангиз, мен сизнинг барчангизни ушбу ишчи гуруҳга киритишим мумкин, шунда кимни суратга олиш мумкин, кимни мумкин эмас, қандай суратга олиш керак – мана шу чегараларни тушуниб оламиз. Келинг, буни ишчи гуруҳда муҳокама қилайлик, чунки бизга айрим мурожаатлар ҳам келмоқда. Фуқаролар ҳам ёзишяпти: мутлақо имкони бўлмай қолди, масалан, бирор жойга бориш, ҳаттоки дўстлар билан бемалол сайр қилишнинг ҳам иложи қолмаяпти”, дейди у.

Балаева журналистларнинг: “Бундай тақиқ амалдорларнинг ўзини ҳимоя қилишга уриниш эмасми?”, деган саволига ҳам жавоб берган.

“Амалдорлар… Биз аллақачон ўрганиб бўлганмиз. Бизнинг аллақачон қариндошларимиз йўқдек, шахсий ҳаётимиз йўқдек, қаерга бормайлик, бизни ҳамма жойда тасвирга олишади. Ҳолбуки, биз ҳам шу мамлакатнинг оддий фуқаролари, оддий инсонларимиз. Шунинг учун, гап фақат амалдорлар ҳақида эмас, умумий мақсад бу йўналишни тартибга солиш.

Шунинг учун, келинг, буни муҳокама қилайлик. Гап шундаки, биз ишчи гуруҳ тузяпмиз ва журналистлардан ҳам, оддий фуқаролардан ҳам келаётган мурожаатларни кўриб чиқамиз”, дея хулоса қилган вазир.

Маълумот учун, пранк – бу одамни ноодатий ёки стрессли вазиятга солиб, унинг реакцияси учун кулиш мақсадида қилинадиган ҳазил ёки ҳийла.

Эслатиб ўтамиз, аввалроқ Тошкент метросида йигитларнинг қўлини ушлаб пранк қилган қозоғистонлик машҳур блогер иши судга оширилгани ҳақида хабар берилган эди. У аввал ҳам шунга ўхшаш хатти-ҳаракатлар содир этган, шундан сўнг у билан профилактик суҳбат ўтказилган, бироқ у бу ҳолатдан тўғри хулоса чиқармаган.