Путин билан тўғридан тўғри музокара олиб боришга тайёрман – Зеленский (видео)

Украина Президенти Владимир Зеленский “дунёдаги барча низолар тугашини кутиб ўтирмаслик” учун Россия Президенти Владимир Путин билан тўғридан тўғри музокаралар ўтказишга тайёрлигини билдирди. Бу ҳақда у бугун, 3 июнь куни Киевда НАТО бош котиби Марк Рютте билан қўшма матбуот анжуманида сўз очди.

Владимир Зеленский Украина урушни дипломатик йўл билан тугатишнинг ҳар қандай форматига, жумладан, Владимир Путин билан тўғридан тўғри музокараларга тайёрлигини маълум қилган. У расмий Киев музокарачиларни жалб этиш бўйича Америка томони билан доимий алоқада бўлиб турганини, бироқ бу жараён чўзилиб кетаётганини қайд этган.

“Биз музокаралар гуруҳи келишини кутмоқдамиз, аммо менинг назаримда, бу жуда узоқ давом этмоқда. Афсуски, биз бугун АҚШнинг диққат марказида эмасмиз. Эрон – АҚШ учун биринчи рақамли масала, Украина эса ундан кейин туради. Афсуски, вазият шундай тус олмоқдаки, биз ушбу урушлар навбатида турибмиз”, дейди Зеленский.

У Украина учун бош устувор вазифа ҳарбий ҳаракатларни тезроқ тўхтатиш эканлигини, шу сабабли давлат тинчликни яқинлаштирадиган ҳар қандай форматни қўллаб-қувватлашга шайлигини урғулаган.

“Мен дунёдаги барча низолар тугаб, кейин навбат бизга келишини кутиб навбатда туришдан кўра, ушбу урушга чек қўйиш учун Путин билан тўғридан тўғри музокаралар олиб боришга тайёрман”, дейди Зеленский.

Украина раҳбари, шунингдек, ҳозирги вазият Украинага “ҳар қандай форматда россияликлар билан тенг шароитда” гаплашиш ва ушбу урушни якунлаш имконини беришини таъкидлаган.

Эслатиб ўтамиз, аввалроқ Кирилл Буданов Владимир Зеленский урушни имкон қадар тезроқ якунлаш бўйича топшириқ берганини айтган эди.