Роналду яна бир ёш футболчини эътироф этди 

Яқинда севгилисига турмуш қуришни таклиф қилган португалиялик футбол юлдузи Криштиану Роналду фаолиятининг дастлабки даврларини ўтказган Лиссабоннинг “Спортинг” жамоасида яқин кунларгача етакчи футболчилардан бири бўлган Виктор Гьёкерешни мақтади. Бу ҳақда “Gazeta Express” нашри Роналдунинг журналистларга берган интервьюсига таяниб хабар берди.

Қайд этилишича, “Ал-Наср” ҳужумчиси шу кунларда “Арсенал” ўйинчисига айланган Гьёкерешни икки сўз билан таърифлаган. Бундан ташқари, Роналду ўзи болалигида тўп сурган собиқ жамоаси – “Спортинг” ҳақида ҳам илиқ фикрлар билдирган. 

“Мен бу лигада рақобат кучли бўлишини истайман. Мен “Спортинг”га ҳар доим энг яхшисини тилайман ва яна чемпион бўлишига умид қиламан.

Гьёкерешми? Биз кўнглимиздан жой олганларни унутмаймиз, деган гап бор-ку! Ишонаманки, “Спортинг” унга муносиб ўринбосар топиб, рақобатда давом этади,

Гьёкереш фантастик футболчи, аммо жамоа энди усиз мослашишга мажбур”, деган Португалия афсонаси. 

Роналдунинг швециялик футболчи ҳақидаги илиқ фикрларидан сўнг ҳатто янги ва умидли ҳужумчиси эътироф этилган “Арсенал” мухлисларининг ҳам бошлари кўкка етган. “Тўпчилар” бу мавсум АПЛда ўз севимли жамоасидан чемпионликни кутмоқда. Улар кетма-кет 3 мавсумдан бери “иккинчи” бўлиб келмоқда. 

Маълумот учун, Гьёкереш “Спортинг” сафида жами 102 ўйинда майдонга тушиб, 97 та гол урган ва 28 та голли узатмани амалга оширган. 27 ёшли швециялик форвард яқинда “Спортинг”дан 63,5+10 млн евро эвазига лондонликлар сафига кўчиб ўтган эди.

Нодир Шукуров