Россия АҚШни Украинага босим ўтказишга чақирди

Россия АҚШни музокараларга рози бўлиши учун Украинага босим ўтказишга чақирди. Бу ҳақда бугун, 16 июль куни Россия Президенти матбуот котиби Дмитрий Песков журналистлар билан ўтказилган матбуот анжуманида сўз очди.

Песковга кўра, Москва Украина билан музокараларнинг учинчи раундининг бўлишини истамоқда ва бу борада АҚШ, хусусан Президент Дональд Трампнинг воситачилик саъй-ҳаракатларига катта умид боғламоқда.

Песков, шунингдек, ҳозирда Ғарб давлатлари томонидан Украинага қурол етказиб бериш масаласи кун тартибида юқори ўринда тургани ҳақида ҳам гапирган. У бу қурол-яроғ савдоларини “бизнес” деб атаб, авваллари ҳам етказиб беришлар бўлгани, фақатгина ким тўлайди, қанча тўлайди, деган саволлар очиқ қолаётганини таъкидлаган. Масалан, у Франция ва Чехия бу харажатларни тўлашни истамаётганини айтган.

Шунингдек, Песков Германиядан TAURUS ракеталарини етказиш борасида зиддиятли баёнотлар янграётганини билдирган. 
Қолаверса, Песков Путин билан Трамп ўртасида телефон суҳбати яқин кунларда режалаштирилмагани, аммо агар зарурат бўлса, бундай мулоқотни жуда тез ташкил этиш мумкинлигини айтган.

Маълумот учун, Россия ва Украина 16 май ва 2 июнь кунлари Истанбулда икки бор тўғридан тўғри учрашув ўтказган, бу музокараларда ҳарбий асирларни алмашиш ва ўт очишни тўхтатиш шартлари бўйича меморандумлар алмашилган. 

Эслатиб ўтамиз, жорий йилнинг 14 июль куни АҚШ раҳбари Дональд Трамп ўзининг Украинадаги можаро бўйича ваъда қилинган баёнотини берганди. У Украина армиясига қурол етказиб беришни Европа иттифоқчилари ҳисобидан бошлашини маълум қилди ва агар 50 кун ичида уруш тўхтатилмаса, Россия ҳамда унинг савдо шерикларига нисбатан 100 фоиз бож жорий этишини ваъда қилди. Европа дипломатияси раҳбари Кая Каллас эса АҚШ Президенти Дональд Трамп Россия етакчиси Владимир Путинга Украина бўйича тинчлик битимини тузиш учун берган 50 кун жуда узоқ эканини айтди.