Россияда қўлга олинган она ва қиз Ўзбекистонга қайтарилди

Кеча 17 февраль куни Россиянинг Новосибирск шаҳрида миграция қонунчилигини бузган аёл ва унинг қизи Ўзбекистонга қайтарилди. Бу ҳақда “Дунё” хабар берди.  

Маълум бўлишича, ёш она Россиянинг миграция қонунчилигини бузгани учун Новосибирск ҳуқуқ-тартибот идоралари томонидан қўлга олинган ва хорижий фуқароларни вақтинча сақлаш марказига жойлаштирилган. Унинг қизи бу вақтда Новосибирскдаги оила ва болаларга ёрдам кўрсатиш марказида бўлган.

Бош консулхона дипломатларининг ҳаракатлари натижасида қизалоқ учун барча зарур ҳужжатлар олинган. Кеча, 17 февраль куни консулхона ходимлари томонидан қизалоқ Новосибирск халқаро аэропортига олиб келинган ва у ерда онаси билан учрашган. Шу куннинг ўзида она ва бола “Новосибирск–Фарғона” рейси билан Ўзбекистонга қайтарилган.

Эслатиб ўтамиз, аввалроқ Швециядан 21 нафар ўзбекистонлик бўлган чартер рейс Тошкент халқаро аэропортига етиб келгани ҳақида хабар берилганди.