Россияда ўзбекистонлик эркак 7-қаватдан тушиб кетган болани қутқариб қолди (видео)

Россиянинг Санкт-Петербург шаҳрида кўп қаватли уйдан қулаган болани ўзбекистонлик фуқаро қутқариб қолди. Бу ҳақда “78.ru” хабар берди.

Маълумотларга кўра, бола еттинчи қаватдаги очиқ дераза ёнида планшет ўйнаб турган. У сирпаниб кетган, лекин аввал карнизга осилиб қолган. Пастда ишлаётган фаррош боланинг қулаши мумкинлигини кўриб, унга деразадан узоқлашишни бақириб айтган. Бола қўлини қўйиб юборганда эса, эркак уни қўли билан ушлаб қолган.

Шундан кейин у болани подъездга олиб кириб, ўзига келтиришга ҳаракат қилган. Тез ёрдам келиб, болани олиб кетган. Онаси ҳодиса пайтида ошхонада бўлган. Айтилишича, болада аутизм бор, у махсус инклюзив марказга қатнайди. Онаси ўғлининг йўқолганини тахминан 10 дақиқадан кейин пайқаган.

Сўнгги маълумотларга кўра, бола реанимацияда, аҳволи барқарор. Унинг оёғи синган ва ички аъзолари жароҳат олган. Ўзбекистонлик фуқаронинг ўзи ҳам жароҳат олган – қўл панжалари ва қовурғалари синган.

Қутқарувчи 36 ёшда. У Петербургда уйларга хизмат кўрсатувчи пудрат ташкилотида ишлайди.

Эсатиб ўтамиз, аввалроқ Қозоғистонда Фавқулодда вазиятлар вазирлиги ходимлари қор бўронида қолиб кетган уч нафар ўзбекистонликни қутқарганди.