Россиядаги ҳарбий госпиталда фельдшерлик қилган ўзбекистонликка суд ҳукми ўқилди

Россия Қуролли кучлари ҳарбий госпиталида 2 йил фельдшерлик қилган самарқандлик эркакнинг озодлиги 4 йилга чекланди. QALAMPIR.UZ суд ҳужжати билан танишди.

Унга кўра, мазкур иш 2025 йилнинг 24 декабрь куни Жиноят ишлари бўйича Паяриқ туман судида кўриб чиқилган. Унда судланувчи С.Б. айбига иқрор бўлган. Эркакнинг айтишича, у 2023 йил 1 май куни ишлаш мақсадида Россия Федерациясининг Петроповловская-Камчатка шаҳрига борган. Дастлаб, хусусий клиникада фельдшер сифатида ишга кирган. Бироқ иши яхши бўлмагани сабабли бошқа иш қидирган. Шундан сўнг, танишларидан Россия ҳарбий кучларига фельдшерларга қабул бўлаётганини, бошқа давлат фуқаролари ҳам қабул қилинаётганини ва ойлик маоши 210 минг рубль миқдорида эканини эшитган.

У Россия Қуролли кучларига ариза билан мурожаат қилган. Кейинроқ, С.Б. га факс орқали унинг аризаси қаноатлантирилгани ва Белград шаҳрига бориши кераклиги ҳақида хабар келган. Шундан сўнг у Белград шаҳрига бориб жойлашган ва 3 кун дам олган. Шу давр мобайнида ҳарбий госпитал бош врачи бир маротаба суҳбат қилган. Суҳбат давомида С.Б. дан қаерданлиги, кимлиги, қаерда ўқигани ва диплом мутахасислиги, иш стажи ҳақида сўралган. Суҳбатдан 2 кун ўтиб эркак ишга қабул қилинган ва 11740-сонли ҳарбий қисмда икки йил давомида фельдшерлик қилган. Хизмати давомида – 2025 йил январь ойида унга Россия Федерацияси фуқаролиги, хизмат ўтаётгани ҳақида ҳарбий гувоҳнома ва ҳарбий жетон берилган.

2025 йил июль ойида Ўзбекистонда унга нисбатан жиноят иши қўзғатилганини билиб, ҳарбий хизмат давомида – 2025 йил 8 октябрь куни таътилга чиққан. Шундан сўнг, қилган қилмиши жиноят эканини англаб, жазо олиши учун таътил вақтида Ўзбекистонга қайтиб келган. Қайтишидан олдин эса Россия томонидан берилган ҳужжатларини ёқиб юборган.

Судланувчи Жиноят кодексининг 154-1-моддаси 2-қисми билан айбли деб топилган ва унга шу модда билан 4 йил муддатга озодликни чеклаш жазоси тайинланган.

Эслатиб ўтамиз, аввалроқ Россия томонидан Украинадаги урушда қатнашган андижонлик эркакка 2 йилга озодликни чеклаш жазоси тайинланганди.