Шавкат Мирзиёев мактаб ўқувчисини 1 млрд 40 млн сўм билан мукофотлади (видео)

Халқаро кимё олимпиадасида ғолиб бўлган мактаб ўқувчиси Далер Раҳимов Ўзбекистон Президенти Шавкат Мирзиёевнинг қарорига асосан 1 миллиард 40 миллион сўм пул мукофоти билан тақдирланди. Бу ҳақда Ёшлар ишлари агентлиги директори Алишер Саъдуллаев ўзининг Telegram каналида маълум қилди.

Далер Раҳимов кеча, 24 февраль куни “Кўксарой” қароргоҳида бўлиб ўтган Президент ва ёшлар учрашувида иштирок этган. Учрашувда у келажакда дунёнинг етакчи университетларида таълим олиб, Ўзбекистонга илк Нобель мукофотини олиб келишни ўз олдига қатъий мақсад қилганини айтган.

“Бугунги кунда мен бутун дунёнинг етакчи университетларига ҳужжатларимни топширмоқдаман. Энг илғор технологияларни ўрганиб, албатта Ўзбекистонга қайтиб келаман. Бобокалонларимиз – Абу Райҳон Беруний, Абу Али ибн Сино қандай қилиб ўз қонуниятларини фанга киритган бўлса, мен ҳам уларни издоши бўлиб илм-фанга ўз ҳиссамни қўшмоқчиман. Менинг мақсадим Ўзбекистонга биринчилардан бўлиб Нобел мукофотини олиб келиш”, дейди у.

Эслатиб ўтамиз, Президент Шавкат Мирзиёев “Кўксарой” қароргоҳида ёшлар билан учрашуви чоғида жонли ижрода қўшиқ куйлаган 4-синф ўқувчисига машина совға қилган эди.