Шоир Сирожиддин Саййид ҳам мукофотланди

Ўзбекистон Олий Мажлиси Сенати аъзоси, Ўзбекистон Ёзувчилар уюшмаси раиси Сирожиддин Саидов (Сирожиддин Саййид) “Эл-юрт ҳурмати” ордени билан тақдирланди. Бу ҳақдаги фармонга бугун, 25 август куни Ўзбекистон Президенти Шавкат Мирзиёев имзо чекди.

Қайд этилишича, ижодкор Ўзбекистонда кенг кўламли ислоҳотларни муваффақиятли амалга ошириш, Янги Ўзбекистоннинг халқаро миқёсдаги обрў-эътибори ва нуфузини юксалтиришга қўшган муносиб ҳиссаси, жамиятда ижтимоий-маънавий барқарорликни сақлаш, ёш авлодни ватанга муҳаббат ва садоқат, миллий ва умуминсоний қадриятларга ҳурмат руҳида тарбиялаш йўлидаги ибратли фаолияти ҳамда жамоат ишларидаги фаол иштироки учун мукофотланган. 

Маълумот учун, Сирожиддин Саййид 1958 йил Сурхондарё вилоятида туғилган. У 2006 йилда “Ўзбекистон халқ шоири” унвонига сазовор бўлган. Унинг дастлабки тўплами “Руҳим харитаси” 1985 йилда чоп этилган бўлиб, кейинчалик “Салқин ҳарсанглар кафтида”, “Севги мамлакати”, “Асрагил”, “Меҳр қолур, муҳаббат қолур”, “Куйдим”, “Ватанни ўрганиш”, “Ватан абадий” каби кўплаб китоблари нашр этилган, танланган асарлари эса “Сўз йўли” номли икки жилдликда жамланган. У Ёзувчилар уюшмасида турли лавозимларда ишлаган, 2018 йилдан бошлаб уюшма раиси сифатида фаолият юритмоқда, 2020 йилда эса Сенат аъзоси этиб тайинланган. Сирожиддин Саййид ижоди учун бир қатор давлат мукофотларига сазовор бўлган, жумладан “Дўстлик” ордени (1999), “Меҳнат шуҳрати” ордени (2021) билан тақдирланган. 

Эслатиб ўтамиз, аввалроқ Ўзбекистон халқ шоири Рауф Парфи (Турсунали Парфиев), Тўра Сулаймон (Тўра Сулаймонов), Муҳаммад Юсуф (Муҳаммаджон Юсупов) ва бошқа ижодкорлар “Фидокорона хизматлари учун” ордени билан тақдирланганди.