Шов-шувли юбилей: Мария Захарова 50 ёшга тўлди

Кеча, 24 декабрь куни 10 йилдан бери “Россия дипломатиясининг овози” бўлиб келаётган Россия Ташқи ишлар вазирлигининг расмий вакили, Ахборот ва матбуот департаменти директори Мария Захарова 50 ёшга тўлди. Унинг юбилейи мамлакатда шов-шувли тарзда нишонланди. Президентдан тортиб, Украинада жанг қилаётган ҳарбий бўлинмаларгача унга табрик йўллади. Совғалар ва унвонлар берилди, жараён эса Россия медиасида кенг ёритилди. 

Дастлаб Россия Федерацияси Президенти Владимир Путин Мария Захаровани юбилейи муносабати билан табрик телеграммаси орқали қутлади. Москва ва бутун Рус патриархи Кирилл эса Захаровани буюк князь Александр Невский ордени (II даража) билан тақдирлади. 

Куннинг иккинчи ярмида Кремлда давлат мукофотларини топшириш маросими бўлиб ўтди ва Путин у ерда ҳам Мария Захаровани юбилейи билан табриклади.

Россия Президенти тантанали маросим чоғида Россия ТИВ Ахборот ва матбуот департаменти директоригa “Ватан олдидаги хизматлари учун” ордени IV даражасини топширди. Путиннинг ушбу орден билан тақдирлаш тўғрисидаги фармони “Россия Федерациясининг ташқи сиёсий курсини амалга оширишга қўшган ҳиссаси ва кўп йиллик виждонан дипломатик хизмати учун” деган изоҳ билан 17 апрель куни эълон қилинган эди.

Орден Путиндан ягона совға эмас эди. Тантанали маросимдан сўнг иштирокчилар шампань бокаллари билан норасмий муҳитда мулоқот қилди ва Путин Захаровагa Кремль ва Георгий Победоносец тасвири туширилган шкатулкани совға қилди. 

Захарова эса Президентга жавоб совғасини қайтарди.

“Мен ҳам сизга совға берсам бўладими? Балки сиз табассум қиларсиз”, деди ТИВ расмий вакили Путинга мурожаат қилиб ва қўлида “(шахсан) В.В. Путинга” деб ёзилган конвертни узатди. 

Захарованинг журналистларга тушунтиришича, конвертда “орденлар ортида нима тургани ҳақидаги кичик эссе” бор.

Маълумот учун, Мария Захарова 1975 йилда туғилган. 1998 йилда Москва давлат халқаро муносабатлар институти халқаро ахборот факультетини халқаро журналистика ихтисослиги бўйича тамомлаганидан сўнг, Россия ТИВ тизимида иш бошлаган. 2015 йил август ойида у Россия Ташқи ишлар вазирлигининг Ахборот ва матбуот департаменти директори этиб тайинланган. Захарова инглиз ва хитой тилларини билади. У Фавқулодда ва мухтор элчи дипломатик унвонига эга. 

Мария Захарова ўз фаолияти давомида Марказий Осиёдаги собиқ иттифоқ давлатларининг ички ишларига халқаро дипломатик қоидаларни унутган ҳолда аралашиб туриши, мамлакати номидан номақбул баёнотлар бериб бориши билан танилган. Масалан, у ўтган йилнинг 23 сентябрь куни Чилонзор туманидаги 188-сонли умумтаълим мактабининг 6-синфида рус тили фани дарсида ўқитувчи Р.О.га ўқувчи Э.Г. гап қайтариб, тортишиб қолгани ортидан Ўзбекистоннинг ички ишларига аралашиб, Тошкентдан тушунтириш беришни ва ўқитувчига чора кўришни сўраган эди. Буни жамоатчилик, фаоллар ва депутатлар бошқа мамлакатнинг ишларига аралашув ва вазиятни сиёсийлаштиришга уриниш, деб баҳолаганди.