Стармер Корея Президентини таржимон билан адаштириб юборди (видео)

Кеча, 18 июнь куни Буюк Британия Бош вазири Кир Стармер G7 саммитида ноқулай ҳолатга тушиб қолди. У Жанубий Кореянинг янги Президенти Ли Чже Мённи таржимон деб ўйлаб, дастлаб бошқа инсонга қўл узатди. Бу ҳақда “The Daily Mail” хабар берди.

Ижтимоий тармоқларда тарқалган видеода Стармер дастлаб таржимонга салом беради, сўнгра ёнига келган аёл ҳақиқий суҳбатдоши – Президент Ли Чже Мёнга ишора қилади. Ҳолат сиёсий музокаралар олдидан юз берган.

Эслатиб ўтамиз, Ли Чже Мён яқинда бўлиб ўтган навбатдан ташқари президент сайловларида “Тобуро” Демократик партиясидан номзод сифатида иштирок этиб, 48,43 фоиз овоз билан ғалаба қозонган эди. Унинг рақиби Ким Мун Су 42,59 фоиз овоз олди. Сайловлар мамлакатнинг собиқ президенти Юн Сок Ёлнинг ҳарбий тўнтариш ҳаракати сабабли импичмент эълон қилиниб, муддатидан олдин чақирилган эди.

G7 саммити якунида эса умумий баёнот қабул қилинмади. Европа давлатлари Россия нефтига қўйилган нарх чегарасини 60 доллардан 45 долларга туширишни истади, аммо бу масалада келишувга эришилмади.

АҚШ Президенти Дональд Трамп саммитни вақтидан олдин тарк этди. Оқ уйнинг билдиришича, бунга Яқин Шарқдаги вазият сабаб бўлган. Германия канцлери Фридрих Мерц Трамп билан учрашувдан сўнг Россияга босимни кучайтириш заруриятини айтган бўлса, Трамп Кир Стармер билан учрашувдан сўнг Россияга қарши санкциялар АҚШга миллиардлаб долларга тушаётганини таъкидлаган.

Стармер эса ўз навбатида Россиянинг қўлида энди ҳеч қандай кучли карта қолмаганини айтди. Кремль бу орада Ғарб босимларига мослашиб улгурганини ва санкциялар орқали фойда олишни ўрганиб бўлганини маълум қилди.