Тим Кук Apple бош директори лавозимини тарк этиши мумкин

Apple компанияси бош директори Тим Кук 2026 йилнинг ўзидаёқ лавозимини тарк этиши мумкин. Унинг эҳтимолий вориси компаниянинг қурилмалар учун аппарат таъминоти бўйича катта вице-президенти Жон Тернус ҳисобланади. Бу ҳақда “Financial Times” хабар берди.

Жорий йилнинг октябрь ойида “Bloomberg” агентлиги ҳам Apple’да раҳбарият алмашинуви бўйича йирик жараён бошланганини ва Тим Кукнинг ўрнига Тернус номзод сифатида кўрилаётганини хабар қилган.

Хабарда айтилишича, Apple Тим Кук келаси йилда бош директор лавозимини тарк этишига тайёрланар экан, раҳбарият алмашуви режасини жадаллаштиряпти. Директорлар кенгаши ва юқори раҳбарият компания қиймати тўрт триллион долларни ташкил этаётган бир пайтда, 14 йилдан ортиқ бошқарувдан сўнг Кукунинг “ҳокимиятни” топширишига фаол тайёргарлик кўряпти. Энг эҳтимолий ворис сифатида Жон Тернус кўрилмоқда, бироқ ҳали якуний қарор қабул қилинмаган.

Газета манбаларига кўра, узоқ вақт режалаштирилган раҳбарият алмашинуви компаниянинг жорий кўрсаткичлари билан боғлиқ эмас. Шунингдек, Apple январь ойининг охиригача янги бош директор тайинлаши эҳтимоли паст экани қайд этилган.

Маълумот учун, 1976 йилда ташкил этилган Apple компанияси шахсий ва планшет компьютерлари, смартфонлар, ақлли соатлар ҳамда дастурий таъминот ишлаб чиқариш билан шуғулланади.

Эслатиб ўтамиз, аввалроқ Apple корпорацияси iPhone’нинг 20 йиллигига бағишлаб шиша смартфон чиқариши мумкинлиги ҳақида хабар берилган эди. Бу сана 2027 йилга тўғри келади. Корпорация “мутлақо янги дизайнга эга” iPhone Pro ишлаб чиқишни ваъда қилган.

Моҳичеҳра Қадамова