Тошкентдаги офисдан 560 минг долларни ўғирлаган шахслар ушланди (видео)

Тошкент шаҳар Миробод туманидаги офисдан 560 минг доллар пулни ўмариб кетган шахслар қўлга тушди. Бу ҳақда Тошкент шаҳар Ички ишлар бош бошқармаси хабар берди.

Қайд этилишича, ўтказилган тезкор тадбирлар натижасида мазкур жиноятга 2 нафар шахс қўл ургани аниқланган. Улар ўзларига тегишли Gentra’да офисга келган ва у ердаги сейфни биргаликда кўтариб, ойнадан улоқтирган. Кейин эса уни 2 киши машинага ортиб, номаълум томонга яширинган. Ушбу сейфда 560 минг АҚШ доллари ва 2 дона флеш-карта ҳамда ҳужжатлар бўлган.

Гумонланувчилардан бирининг шахсига аниқлик киритилиб, зудлик билан қўлга олинган. Шунингдек, етказилган зарар – 440 минг АҚШ доллари ва 1 дона Honda русумли мотоцикл қайтарилган. Қўлга тушган шахснинг кўрсатмалари асосида унинг яшаш хонадони кўздан кечирилганда улар сейфни “болгарка” орқали кесиб, очгани ва пулларни ўзлаштиргани, сейфнинг ўзини эса уй яқинидаги каналга улоқтиргани аниқланган.

Гумонланувчилар офисни ўмаргандан кейин Андижон орқали Қирғизистонга чиқиб кетишни режалаштирган, бироқ олиб борилган тадбир натижасида улар Андижон шаҳридаги меҳмонхоналарнинг бирида қўлга олинган ва пойтахтга олиб келинган.

Эсалтиб ўтамиз, аввалроқ Фарғона вилоятининг Фарғона шаҳрида бировнинг квартирасини сотиб олиб, унга пул бермай, қўрқиқтиш йўли билан эгалламоқчи бўлган жиноий гуруҳ қўлга олинганди.