“Трамп ағдарилади”. Хоманаий халққа мурожаат қилди (видео)

Эрон Олий раҳнамоси Оятуллоҳ Али Хоманаий АҚШ Президенти Дональд Трампни огоҳлантирди ва у барибир қулатилишини айтди. Бу ҳақда у бугун, 9 январь куни телевидение орқали халққа йўллаган мурожаатида сўз очди.

У нутқида Эрондаги норозилик намойишлари ҳақида гапириб, мамлакатни беқарорлаштиришга уринаётган кучлар хориждан қўллаб-қувватланаётганини билдирган.

“Трамп шуни билиб қўйсин: Фиръавн, Нимруд, Ризо Шоҳ ва Муҳаммад Ризо каби дунё золимлари мағрурлигининг энг юқори чўққисида қулатилган. У ҳам қулатилади”, дейди Хоманаий.

У Эрон тартибсизликлар қаршисида ортга чекинмаслигини айтган.

“Ҳамма билсин: Ислом Республикаси юз минглаб шарафли инсонларнинг қони эвазига ҳокимиятга келган ва бузғунчилар қаршисида ҳеч қачон орқага чекинмайди”, дейди у.

Мамлакатдаги норозилик намойишларига тўхталар экан, Хоманаий намойишчиларни АҚШ Президентини мамнун қилиш учун ҳаракат қилаётганликда айблаган.

“Улар уни хурсанд қилишни хоҳлайди. Агар у давлатни қандай бошқаришни билганида эди, ўз мамлакатини бошқарган бўларди”, деган Хоманаий ва Қўшма Штатларнинг ўзида ҳам жуда кўп муаммолар борлигини қўшимча қилган.

Хоманаий 2025 йил июнь ойидаги ҳужумларни эслар экан, 12 кунлик урушда мингдан ортиқ эронлик шаҳид бўлганини, АҚШ Президенти “Мен буйруқ бердим ва ҳужумни бошқардим”, деганини айтиб, буни “унинг қўллари эронликлар қони билан булғанганини тан олиш” деб баҳолаган.

Шу билан бирга, Хоманаий тарафдорларини бирликни сақлашга чақирган.

“Азиз ёшлар, тайёргарлигингизни ва  асранг. Бирлашган халқ ҳар қандай душманни енгади”, дейди у.

Эрондаги намойишлар

Эслатиб ўтамиз, 2025 йилнинг сўнгги кунларида Эрон пойтахти Теҳронда маҳаллий валюта – эрон риали қийматининг кескин пасайиши фонида норозилик намойишлари бошланган эди.

Кейинроқ бу намойишлар кучайиб кетди. Оғир иқтисодий вазият ва юқори инфляция фонида бошланган намойишларнинг бешинчи кунида норозилик чоғида 6 киши ҳалок бўлгани ва 17 киши жароҳат олгани маълум бўлди.

3 январь куни Оятуллоҳ Али Хоманаий биринчи марта мамлакатда давом этаётган оммавий норозилик намойишлари ҳақида очиқ гапирди. Давлат телевидениесида сўзлаган нутқида у воқеаларни “ички ва ташқи душманларнинг фитнаси” деб атаган ва “тартибсизликларни қўзғатувчилар”нинг ҳаракатларига қаттиқ қаршилик кўрсатишни талаб қилганди.

Ушбу тартибсизликларинг тўққизинчи кунида камида 35 киши ҳалок бўлгани, 1200 дан ортиқ одам ҳибсга олингани маълум бўлди. Ўша вақтга келиб 2025 йил 28 декабрь куни бошланган норозилик намойишлари мамлакатдаги 31 вилоятнинг 27 тасида, камида 88 шаҳарда кузатилди. Ҳуқуқ ҳимоячиларининг ёзишича, баъзан Эрон хавфсизлик кучлари намойишчиларга қарши куч ишлатган.

6 январдан бугун, 7 январга ўтар кечаси эса Эроннинг Ироқ билан чегарага яқин жойлашган Обиданон шаҳри (Илом вилояти) намойишчилар томонидан тўлиқ назоратга олингани ҳақида хабарлар пайдо бўлди. Бироқ кейинроқ, Эроннинг “Tasnim” ва “Mehr” ахборот агентликлари Ғарб ОАВларида тарқалган Маликшоҳи округи ва Обиданон шаҳри намойишчилар томонидан эгаллаб олингани ҳақидаги хабарларни рад этди.  

Тартибсизликларнинг 12-кунида эса мамлакатда интернет сегментидаги трафик бутунлай ўчирилди. Cloudflare IT-компанияси маълумотига кўра, 8 январь куни Эрондаги интернет-трафик қарийб 90 фоизга камайган. Тахминларга кўра, интернетдан эркин фойдаланиш фақат мансабдорлар ва куч тузилмалари вакилларида сақланиб қолган.