Трамп Эрон АҚШдан сулҳ сўраганини айтди

Эроннинг янги раҳбарияти АҚШга сулҳ тузиш бўйича сўров юборган. Бу ҳақда бугун, 1 апрель куни АҚШ Президенти Дональд Трамп ўзининг Truth Social ижтимоий тармоғидаги саҳифасида ёзди. 

Унинг сўзларига кўра, Вашингтон розилиги учун асосий шарт Ҳормуз бўғозининг очилиши ҳисобланади. Ушбу стратегик сув йўли блокададан чиқарилмагунча, Америка ҳарбийлари Эронни “кул-талқон қилишда ёки айтилганидек, тош даврига қайтаришда” давом этади.

“Аввалгиларига қараганда анча камроқ радикал ва анча ақллироқ Эрон режимининг янги раҳбари ҳозигина Америка Қўшма Штатларидан ўт очишни тўхтатишни сўради! Ҳормуз бўғози очиқ, эркин ва тозаланган бўлса, биз бу таклифни кўриб чиқамиз”, деб ёзди Оқ уй раҳбари. 

У Эрон раҳбарларидан айнан ким сулҳ сўраганига аниқлик киритмаган.

Ушбу баёнот Трамп 28 февралда бошланган “Эпик ғазаб” (Epic Fury) операциясини имкон қадар тезроқ якунлаш истагини билдирганидан бир кун ўтиб янгради. 

Эслатиб ўтамиз, аввалроқ у журналистларга АҚШ Эрондан “икки-уч ҳафта ичида” чиқиб кетишини ва урушни тугатиш учун Эрон билан тинчлик шартномаси тузиш шарт эмаслигини айтган эди.

Бугун, 1 апрель куни АҚШ Президенти “Reuters” билан суҳбатда АҚШ Эрондан “анча тез” чиқиб кетиши мумкинлигини, аммо зарурат туғилганда “нуқтали зарбалар” бериш учун қайтишини айтди. Унинг сўзларига кўра, Америка ҳарбийларининг ҳаракатлари туфайли Теҳрон ядровий арсеналга эга бўлолмаслиги кафолатланган. 

“Уларда ядро қуроли бўлмайди, чунки ҳозир бунга қодир эмаслар, кейин эса мен кетаман... ва агар керак бўлса, биз нуқтали зарбалар бериш учун қайтамиз”, дейди Президент.

Вашингтон Эронга қарши операцияни қачон тугаган деб ҳисоблаши ҳақидаги саволга Трамп: “Сизга аниқ айта олмайман... биз ундан анча тез чиқамиз”, деб жавоб берди.

Кеча, 31 март куни Эрон Президенти Масъуд Пезешкиён Европа Иттифоқи Кенгаши раҳбари Антониу Коштага Эроннинг “ушбу урушни тўхтатиш учун зарур иродаси борлигини” айтган эди. Бироқ унинг таъкидлашича, бу маълум шартларнинг бажарилишига боғлиқ. Гап, афтидан, Эрон урушни тугатиш ва Ҳормуз бўғозини очиш учун талаб қилаётган беш банд ҳақида кетмоқда.

Хусусан, гап АҚШ ва Исроилнинг Эронга, шунингдек, Яқин Шарқдаги Эрон прокси-кучларига ҳужумларини тўлиқ тўхтатиш, Теҳронга репарация тўлаш ва Ҳормуз бўғози устидан Эрон суверенитетини халқаро миқёсда тан олиш ҳақида бормоқда.