Трамп Эронга яна ҳужум бошламоқчи – ОАВ

АҚШ Президенти Дональд Трамп Эронга қарши ҳарбий ҳаракатларни қайта бошлаш масаласини жиддий кўриб чиқмоқда. Бу ҳақда ўз манбаларига таяниб, CNN хабар берди.

Манбаларга кўра, Трамп Теҳроннинг урушни тўхтатиш бўйича музокараларни олиб бориш услубидан тобора норози бўлиб бормоқда. Оқ уйдаги айрим маслаҳатчиларнинг айтишича, у сўнгги ҳафталарга нисбатан анча қатъий позицияда.

CNN суҳбатдошларига кўра, Трамп Ҳормуз бўғозининг ёпиқ қолиши ва Эрон раҳбарияти ичидаги бўлинишдан асабийлашмоқда. Унинг фикрича, айнан шу ички келишмовчиликлар Теҳроннинг ядровий музокараларда ён беришини қийинлаштиряпти.

Манбаларга кўра, Трамп маъмурияти ичида ҳам турли қарашлар мавжуд. Хусусан, Пентагондаги айримлар Эронни музокара столига мажбурлаш учун қаттиқроқ босим ва ҳатто янги зарбалар тарафдори. Бошқалар эса дипломатияга ҳали имконият бериш кераклигини айтмоқда.

Шу билан бирга, Трамп атрофидагилар Покистон воситачиларидан ҳам қаттиқроқ позиция кутмоқда. Айрим америкалик амалдорлар Покистон Эрон позициясини Вашингтонга реал ҳолатдан кўра “ижобийроқ” қилиб кўрсатаётганига шубҳа билдирган.

Эслатиб ўтамиз, аввалроқ АҚШ Президенти Дональд Трамп Эроннинг янги тинчлик таклифларини кескин рад этганди. У янги таклиф лойиҳасини “буни мутлқо қабул қилиб бўлмайди” деган. Маълумотларга кўра, Эрон АҚШга кўп саҳифали режа юборган. Ҳужжат Покистон орқали етказилган.