Трамп Ғазога боради

АҚШ Президенти Дональд Трамп Ғазо секторига ташриф буюриш ва Яқин Шарқдаги вазиятни ҳал қилишда муҳим роль ўйнайдиган “Тинчлик Кенгаши”га раислик қилиш ниятини эълон қилди. Бу ҳақда Оқ уй раҳбари “The Time” журналига берган интервьюсида сўз очди.

“Ҳа, бораман. Биз “Тинчлик Кенгаши”ни туздик ва мендан унга раислик қилиш сўралди. Ишонинг, бу мен хоҳлаган нарса эмас эди, лекин бу кенгаш Яқин Шарқ устидан катта ваколатга эга бўлган жуда таъсирли тузилмага айланади”, деган Трамп. 

Унинг таъкидлашича, Яқин Шарқ ҳеч қачон ҳозиргидек бирлашмаган. ҲАМАС эса ушбу бирлашув ичида мавжуд эмас ва ҳаракат фақатгина келишувларга назарий жиҳатдан рози бўлган. 

“Агар улар бунга қарши чиқишга қарор қилса ва биз уларга қарши чоралар кўрсак, ҳеч ким эътироз билдирмайди”, дея қўшимча қилган Оқ уй раҳбари. 

9 октябрь куни Трамп Исроил ва ҲАМАС ҳаракати Ғазо секторидаги икки йиллик қуролли можарони ҳал қилиш бўйича келишувга эришганини эълон қилди. Бу келишув Трамп режаси доирасида амалга оширилди. 

29 сентябрь куни тақдим этилган Трампнинг режаси 20 банддан иборат бўлиб, гаровга олинганларни 72 соат ичида озод қилиш шарти билан дарҳол сулҳ тузишга чақиради. Ҳужжатда, шунингдек, ҲАМАС ва бошқа Фаластин гуруҳлари Ғазо секторини бошқаришда иштирок этмаслиги, назорат Трампнинг ўзи бошчилигидаги халқаро назорат остидаги технократик ҳокимиятга ўтказилиши белгиланган. Исроил билан келишувнинг бир қисми сифатида ҲАМАС ҳаракати 2023 йил 7 октябрдан бери Ғазода ушлаб турилган 20 нафар гаровга олинганлар ва бошқа муддатларда гаровга олинган барча маҳбусларни озод қилди. Келишувга мувофиқ Исроил ҳам 1718 маҳбусни ва умрбод ёки узоқ муддатли қамоқ жазосини ўтаётган 250 фаластинлик маҳбусни озод этди. 

Эслатиб ўтамиз, аввалроқ Трамп Яқин Шарқ мамлакатлари ва бошқа иттифоқчилар ҲАМАС ҳаракати вакилларини жиловлаб қўйиш учун Ғазо ҳудудига қўшин киритишга тайёрлиги ва агар ҲАМАС буйруққа бўйсунмаса, ушбу кучлар уларга қарши ҳаракатга келишини билдирганди.