Трампга америкаликларнинг қанчаси ишонади?

АҚШнинг Эронга қарши бошлаган ҳарбий амалиёти ички майдонда кутилгандай якдил қўллаб-қувватловга эга эмас. Сўров натижаларига кўра, америкаликларнинг атиги 27 фоизи зарбаларни маъқуллаган. 43 фоиз очиқ қарши чиққан, қарийб учдан бири эса аниқ позиция билдирмаган. Яъни жамият иккиланмоқда, бу эса Вашингтон учун жиддий сиёсий сигнал. Бу ҳақда “Reuters” нашри хабар берди.

Сўров натижалари яна бир тенденцияни очиб берган: жавоб берганларнинг 56 фоизи Президент Дональд Трамп ташқи сиёсатда ҳарбий кучдан фойдаланишга ҳаддан ташқари мойил, деб ҳисоблайди. Демократлар орасида бу кўрсаткич 87 фоизга етган бўлса, ҳатто республикачиларнинг 23 фоизи ҳам шундай фикрда. Бу рақамлар партиялараро чегаралардан ташқари хавотир борлигини кўрсатади.

Энг нозик нуқта — қурбонлар масаласи. Сўровда иштирок этган республикачиларнинг 42 фоизи агар Яқин Шарқда америкалик ҳарбийлар ҳалок бўлса ёки яраланса, бу кампанияни қўллаб-қувватламаслигини билдирган. Нефть нархининг ошиши ҳам жамоатчилик муносабатига таъсир қилади: иштирокчиларнинг 45 фоизи ёқилғи қимматласа, позициясини қайта кўриб чиқишини айтган. Демак, фронтдаги эмас, ёқилғи қуйиш шаҳобчаларидаги вазият ҳам сиёсий кайфиятни белгилайди.

Зарбалар АҚШ ва Исроилнинг қўшма амалиёти сифатида бошланган. Вашингтон Эрондан уран бойитишдан тўлиқ воз кечишни талаб қилмоқда, Теҳрон эса ядровий дастур тинч мақсадларга қаратилганини таъкидламоқда. Бироқ музокаралар тўхтаган паллада ҳарбий йўл танланган. Энди эса ички майдонда ушбу савол ўртага чиқмоқда: бу қарор стратегик заруратми ёки сиёсий таваккал?

Президентнинг умумий рейтинги 39 фоизга тушгани ҳам фонни янада мураккаблаштиради. Олдинда Конгресс сайловлари турибди, сайловчиларнинг асосий ташвиши эса иқтисод. Демак, ташқи фронтдаги ҳар бир ҳаракат ички сиёсий натижага айланиши мумкин.