“Туҳмат!” Мелания Трамп Эпштейн ҳақида кескин баёнот берди

АҚШ биринчи хоними Мелания Трамп педофилияда айбланган мархум молиячи Жеффри Эпштейн ишига ҳеч қандай алоқаси йўқлигини айтди. Бу ҳақда у кеча, 9 апрель куни Оқ уйда журналистлар билан ўтказилган матбуот анжуманида сўз очди.

Мелания Трамп Жеффри Эпштейн ишида омон қолган жабрланувчилар ва қурбонларнинг яқинларини эшитиш учун мамлакат Конгрессидан тинглов жараёнини ташкил этиш ва улардан Конгресс олдида қасамёд билан гувоҳлик бериш имкониятини тақдим этишни сўраган.

“Ҳар бир аёл, албатта ўзи хоҳласа, омма олдида ўз хикоясини сўзлаб беришга ҳақли. Шундан сўнг, уларнинг кўрсатмалари Конгресс баённомасида расмийлаштирилади. Ўшандагина биз воқеликнинг туб мазмунига етиб бориб, ҳақиқатга эришишимиз мумкин”, дейди биринчи хоним. 

Шунингдек, Оқ уй бекаси Эпштейн билан атиги бир-неча маротаба суҳбатлашганини ва унинг жиноий фаолиятларидан мутлақо бехабар бўлганини айтган. 

“Мен ўша пайтда Эпштейннинг ўз қурбонларига нисбатан шавқатсиз зўравонликлар қилиши ҳақида билмас эдим. Унинг жиноий қилмишларида ҳеч қачон иштирок этмаганман. У билан фақатгина бизнес масаласида қисқа муддат суҳбатлашганмиз. Мен Эпштейн ишининг иштирокчиси эмасман. Менга билдирилаётган айбловларнинг ҳаммаси тухмат”, дейди Мелания Трамп.

Бундан ташқари, у ҳақида ижтимоий тармоқларда тарқалган турли миш-мишларни ҳам кескин рад этган.

“Ижтимоий тармоқларда мени обрўсизлантириш учун тарқатилаётган барча хабарлар ёлғон. Мени эрим Дональд Трамп билан базмда Эпштейн воситачилигида танишиб қолган деган гаплар мутлақо асоссиз. Бу ҳаракатлар душманларим томонидан мени обрўсизлантириш учун ташкиллаштирилган пасткаш уринишлардир”, дейди Мелания Трамп.

Қолаверса, биринчи хоним Эпштейннинг жиноий шериги ва бизнес ҳамтовоғи Гислейн Максвеллни танимаслигини ҳамда у билан ҳеч қачон учрашмаганини даъво қилган. У Эпштейн файлларида эълон қилинган Максвеллга ёзилган мактубни шунчаки ёзилган одатий суҳбатга “мулойим жавоб ” бергани билан изоҳлаган.

“Nеw York” журналида чоп этилган Мелания ва Гислейннинг мактуби “Азизим “Г”га” дея бошланади.

“Мен сени Палм-Бичга келишингни интиқлик билан кутяпман. Нью-Йоркга қайтганингда менга албатта қўнғироқ қил. Сенга мароқли ҳордиқ тилайман. Муҳаббат билан, Мелания.” дейилади мактубда.

Қайд этиш жоиз, биринчи хонимнинг Оқ уйда журналистлар билан махсус матбуот анжумани уюштириши камдан-кам кузатиладиган ҳолат ҳисобланади. Мелания Трампнинг Эпштейн файлларидаги хатлари оммага эълон қилинганидан сўнг бир неча китоб ва газеталарда марҳум педофил ва Оқ уй бекасининг муносабатлари тўғрисида эълон қилинган мақола, иқтибос ва карикатуралар ортидан бир нечта нашрлар устидан суд жараёнлари бошланиб кетган.

“Мен ҳеч иккиланмасдан адвокатларим бундай асоссиз ёлғонларга қарши муваффақиятли курашдик, дея айта оламан ва ўз обрўйимни сақлаб қолишда давом этаман”, дейди у.

Жумладан, Майкл Вулф ўзининг “Олов ва ғазаб” (Fire and Fury) китобида Меланиянинг Трамп билан танишувини Палм-Беач оролида Эпштейн томонидан ташкиллаштирилганлиги тўғрисидаги боби учун ёзувчига нисбатан Мелания Трамп номидан фуқоролик судига ариза киритилган. Американинг дунёга машхур янгиликлар нашри “Daily Beast” ҳам ҳудди шундай мақоласи учун киритилган шикоят аризасидан сўнг биринчи хонимдан узр сўраб, мақоласини қайтариб олган.

Эслатиб ўтамиз, аввалроқ америкалик тадбиркор Илон Маскнинг отаси Эррол Маск Жеффри Эпштейн ўлмагани, у ҳануз тириклиги ҳақида иддао қилиб чиққан эди.

Ҳожиакбар Муҳаммаджонов