Ўғирланган ўқувчи қизлар қутқарилди

Жорий йилнинг 17 ноябрида қуролли шахслар томонидан Нигериянинг шимоли-ғарбидаги мактаб-интернатидан ўғирланган 24 ўқувчи қиз қутқарилди. Бу ҳақда Нигерия Президенти Бола Тинубу маълум қилди. 

“Барча 24 қиз топилгани мени хурсанд қилди. Энди биз заиф ҳудудларда қўшимча чораларни тезкор кўришимиз керак, шунда келажакда бундай ўғирланишлар олди олинади”, деган мамлакат раҳбари. 

Қайд этиш жоиз, ҳужум 17 ноябрь куни эрталаб соат тўртларда содир бўлган, бу пайтда ўқувчилар ҳали ухлаётган эди. Қуролли шахслар мактабнинг тўсиғидан ошиб, бинога кирган ва болаларни яқин атрофдаги ўрмон томон олиб кетган. Қаршилик кўрсатган мактаб директорининг ўринбосари ўқ узилиши оқибатида ҳалок бўлган, бир ўқитувчи жароҳатланган.

Сўнгги ҳафталарда Нигерияда қуролли гуруҳлар диний ва таълим муассасаларига бир неча бор ҳужум қилган. 19 ноябрда номаълум шахслар Эруку шаҳридаги черковга ҳужум қилиб, пасторни ўғирлаган ва камида икки киши ҳалок бўлган. 21 ноябрда эса Муқаддас Мария католик мактабидан 50 дан ортиқ бола ўғирланган. Кейинги кун – 22 ноябрда Нигериянинг ғарбида жангарилар Муқаддас Мария католик мактабидан 300 дан ортиқ ўқувчи ва 12 ўқитувчини олиб кетган.

Эслатиб ўтамиз, Нигерияда ўтган ҳафта католик мактабидан ўғирлаб кетилган 300 дан ортиқ ўқувчидан 50 нафари қочиб қутулиб, ота-оналари ёнига қайтганди.