Украина-Россия урушини фақат сиз тўхтата оласиз – Мирзиёев Трампга

Ўзбекистон Республикаси Президенти Шавкат Мирзиёев АҚШ Президентининг расмий қароргоҳи – Вашингтон шаҳридаги Оқ уйда бўлиб ўтган Марказий Осиё мамлакатлари ва АҚШ етакчиларининг “С5+1” форматидаги саммитида иштирок этди.

“Ҳурматли жаноб Трамп, биз С5+1 форматидаги янгиланган ҳамкорликни қайта фаоллаштиришдаги сизнинг шахсий ҳиссангизни юксак қадрлаймиз. Аслида, бугунгача ҳеч бир Америка президенти Марказий Осиёга бундай эътибор ва муносабат билан ёндашмаган. Мен шахсан ўзим ва барча ҳамкасбларим номидан чуқур миннатдорчилик билдираман. Биз сизнинг томонингиздан бўлган эътиборни чин дилдан ҳис қилдик, бу бизнинг учун катта аҳамиятга эга”, деди Мирзиёев.

У Ўзбекистонда “Президент Трампни тинчлик президенти” деб айтишларини таъкидлади ва АҚШ етакчиси жаҳоннинг саккизта можаросини бартараф этишда катта ишлар қилганини қайд этди. 

“Ишонаманки, Украина ва Россия ўртасидаги урушни ҳам фақат сиз тўхтата оласиз. Биз бу борада катта умиддамиз”, деди Мирзиёев.

Президент Дональд Трамп раислигида ўтган тадбирда Қозоғистон Республикаси Президенти Қосим-Жомарт Тўқаев, Қирғиз Республикаси Президенти Садир Жапаров, Тожикистон Республикаси Президенти Имомали Раҳмон ва Туркманистон Президенти Сердар Бердимуҳамедов ҳам қатнашди.