Украина ва АҚШ Швейцарияда тинчлик режасини муҳокама қилади

Украина ва АҚШ Россия билан можарони ҳал этиш бўйича тинчлик режасини муҳокама қилиш учун Швейцарияда учрашув ўтказади. Бу ҳақда Украина Миллий хавфсизлик ва мудофаа кенгаши котиби Рустам Умаров ўзининг Telegram-каналида маълум қилди.

“Яқин кунларда Швейцарияда Украина ва АҚШнинг юқори мартабали расмийлари ўртасида келажакдаги тинчлик келишувининг эҳтимолий параметрлари бўйича маслаҳатлашувларни бошлаймиз”, деб ёзган Умаров. 

Шунингдек, Украина Президенти Владимир Зеленскийнинг сайтида АҚШ ва бошқа халқаро ҳамкорлар, шунингдек Россия Федерацияси вакиллари билан адолатли ва барқарор тинчликка эришиш бўйича музокараларда иштирок этадиган делегация таркиби эълон қилинган. Уни Зеленский тасдиқлаган.

Украинадан музокараларга қуйидагилар боради:

• Украина Президенти офиси раҳбари, делегация бошлиғи Андрей Ермак; 
• Миллий хавфсизлик ва мудофаа кенгаши (МХМК) котиби Рустам Умаров; 
• Бош разведка бошқармаси раҳбари Кирилл Буданов; 
• Украина Қуролли кучлари Бош штаби бошлиғи Андрей Гнатов; 
• Ташқи разведка хизмати раҳбари Олег Ивашенко; 
• Ташқи ишлар вазирининг биринчи ўринбосари Сергей Кислица; 
• МХМК котибининг биринчи ўринбосари Евгений Острянский; 
• Хавфсизлик хизмати раисининг ўринбосари Александр Поклад; 
• Президент администрацияси раҳбари маслаҳатчиси Александр Бевз.

Маълумот учун, АҚШ Президенти Дональд Трампнинг режаси 28 банддан иборат. Уни Трампнинг махсус элчиси Стив Уиткофф Россия Президентининг махсус вакили Кирилл Дмитриев билан маслаҳатлашган ҳолда ишлаб чиққан. Киев бу ҳужжатни Кремль учун жуда қулай, деб ҳисоблайди. Хусусан, режа Россия босиб ололмаган Донбасс ҳудудларининг топширилишини, Украина Қуролли кучларини қисқартиришни, НАТОга киришдан воз кечишни ва мамлакат ҳудудида альянс қўшинларини жойлаштиришни тақиқлашни назарда тутади. Россия учун эса босқичма-босқич санкцияларни бекор қилиш, G8 форматини тиклаш ва ҳарбий жиноятлар учун амнистия таклиф қилинади.
 
Эслатиб ўтамиз, аввалроқ Владимир Зеленский Украина халқи учун 10 дақиқалик мурожаат йўллаб, АҚШ таклиф этган урушни тугатиш бўйича тинчлик режаси юзасидан ўз фикрини билдирганди. У мамлакат оғир даврни бошдан кечираётганини қайд этган. Шунингдек, Владимир Путин ҳам Дональд Трамп томонидан Владимир Зеленскийга таклиф қилинган урушни тугатиш режаси ҳақида изоҳ берганди.

АҚШ Президенти эса Зеленский унинг тинчлик режасини маъқуллашига тўғри келишини айтди. Трамп Украина келишувга рози бўлиши учун жорий йилнинг 27 ноябрини якуний муддат сифатида белгилаган.