Ўзбекистонда ишсизлик даражаси пасайди – Бандлик вазирлиги

2025 йилнинг III чорагига кўра, Ўзбекистонда ишсизлик даражаси 4,9 фоизни ташкил этди. Бу кўрсаткич 2024 йилнинг шу даврига нисбатан 0,8 пунктга камайган. Бу ҳақда Камбағалликни қисқартириш ва бандлик вазирлиги хабар берди. 

Вазирликка кўра, Ўзбекистонда аҳоли сони 37,8 млн кишини ташкил қилган бўлса, шундан:

• Меҳнат ресурслари: 20,35 млн (1,9 фоиз ўсган ёки 387,3 мингга кўпайган);
• Иқтисодий фаол аҳоли 15,57 млн кишини;
• Банд аҳоли эса 14,81 млн кишини (4,1 фоиз ўсган ёки 579,6 мингга кўпайган) ташкил қилган.

Шу билан бирга, расмий секторда ишлаётганлар 8,58 млн кишини (17 фоиз ўсган ёки 1 243,7 мингга кўпайган), норасмий секторда меҳнат қилаётганлар 4,38 млн кишини (26,9 тушган ёки 1 176,0 мингга камайган) ташкил қилган. 

Четга ишлашга кетганлар сони 1,86 млн кишига (512 мингга кўпайган) етган. Айни дамда мамлакатда ишга жойлаштиришга талабгорлар 760 минг одамни ташкил қилмоқда. 

Вазирликнинг қўшимча қилишича, 2025 йилда 4,45 млн аҳоли даромадли меҳнат билан таъминланган:

• Қишлоқ хўжалиги: 1,29 млн;
• Хизмат кўрсатиш: 2,74 млн;
• Қурилиш: 172,3 минг;
• Инвестиция лойиҳалари орқали: 256,2 минг. 

Маълумот учун, Ўзбекистонда 2025 йилнинг II чорагида ишсизлик даражаси 5,1 фоизни ташкил этганди. 

Эслатиб ўтамиз, аввалроқ Ўзбекистонда 2025 йил 1 ноябрдан ишсизлик нафақасини тўлаш тартиби ўзгаргани ҳақида хабар берилганди.