Вашингтонда Трамп ва Эпштейн тасвирланган сатирик ҳайкал ўрнатилди

АҚШ пойтахти Вашингтон шаҳридаги Капитолий биноси рўпарасига номаълум рассомлар томонидан АҚШ Президенти Дональд Трамп ва марҳум молиячи Жеффри Эпштейн тасвирланган сатирик ҳайкал ўрнатилди. Бу ҳақда “The Washington Post” нашри хабар берди.

Қайд этилишича, ҳайкал “Титаник” фильмидаги машҳур саҳнага ўхшаш тарзда ясалган. Олтин рангга бўялган инсталляцияда Дональд Трамп Жеффри Эпштейнни орқадан қучоқлаб турибди. У кемага ўхшаш майдонга жойлаштирилган. Улар фильм қаҳрамонлари Жек ва Роуз ролларида тасвирланган.

Ҳайкал ёнига қўйилган лавҳада ушбу инсталляция Трамп ва Эпштейн ўртасидаги муносабатларга киноя сифатида ясалгани ёзилган. Шунингдек, ҳайкал билан Капитолий биноси орасига Трамп ва Эпштейннинг бирга тушган сурати акс этган 10 та баннер ҳам ўрнатилган.

Нашрнинг ёзишича, Дональд Трамп ва 2019 йилда қамоқда вафот этган Жеффри Эпштейн ўртасида илгари дўстлик бўлган. Трамп Эпштейнни анча йиллардан бери танишини, бироқ улар 2000 йилларнинг ўрталарида жанжаллашиб қолганини айтган. Шунингдек, у Эпштейннинг жиноий фаолиятидан бехабар бўлганини таъкидлаган.

Эслатиб ўтамиз, аввароқ Жеффри Эпштейн файлларидан Дональд Трампга алоқадар кўрсатмалар ўчиб кетгани ҳақида хабар берилганди.