Венесуэла АҚШдан ҳарбий тажовуз бўлаётганини эълон қилди

north_east

Венесуэла Президенти рафиқаси билан қўлга олинди ва мамлакатдан олиб кетилди – Трамп

Венесуэла Ташқи ишлар вазирлиги АҚШнинг ўз мамлакатига қарши очиқчасига тажовузини қоралади. Бу ҳақда Венесуэла Ташқи ишлар вазири Иван Хилнинг Telegram каналида эълон қилинган баёнотда айтилган. 

“Венесуэла Боливар Республикаси Америка Қўшма Штатларининг амалдаги ҳукумати томонидан Венесуэла ҳудуди ва аҳолисига қарши республика пойтахти Каракас шаҳрининг фуқаролик ва ҳарбий ҳудудларида, шунингдек, Миранда,  Арагуа ва Ла-Гуайра штатларида амалга оширилган очиқчасига ҳарбий тажовузни рад этади, қоралайди ва халқаро ҳамжамиятга эълон қилади”, дейилади баёнотда. 

Мамлакат Ташқи ишлар вазирлиги ушбу ҳаракат Бирлашган Миллатлар Ташкилоти Низомини қўпол равишда бузиш, шунингдек, тинчлик ва халқаро барқарорликка, хусусан, Лотин Америкаси ва Кариб денгизида таҳдид солишини ва миллионлаб одамларнинг ҳаётини жиддий хавф остига қўйишини таъкидлайди.  

“Бу ҳужумнинг мақсади Венесуэланинг стратегик ресурсларини, хусусан, унинг нефть ва минералларини тортиб олиш ва мамлакатнинг сиёсий мустақиллигини мажбуран бузишга уринишдан бошқа нарса эмас. Бу амалга ошмайди”, дейилади вазирлик баёнотида. 

Аввалроқ Венесуэла пойтахти Каракасда бир нечта портлашлар содир бўлгани ҳақида хабар берилган эди. Портлаш овозлари шаҳарнинг турли қисмларида, шунингдек, Майкетиядаги Симон Боливар аэропортида ва Ла-Гуайра портида эшитилган. 

Мамлакатда фавқулодда ҳолат эълон қилинган. 

АҚШ армияси Каракасдаги портлашларда Америка кучларининг иштироки эҳтимоли ҳақида изоҳ беришдан бош тортди.