Венесуэлада Мадуронинг тарафдорлари оммавий намойиш ўтказди

Кеча, 3 февраль куни Венесуэла пойтахти Каракас шаҳрида минглаб одамлар АҚШ томонидан қўлга олинган президент Николас Мадуро ва унинг рафиқаси Силия Флоресни озод қилиш талаби билан намойиш ўтказди. Бу ҳақда “Al Jazeera” хабар берди.

Намойишлар АҚШ кучлари томонидан ҳукумат раҳбарининг ўғирлаб кетилганига бир ой тўлиши муносабати билан ўтказилган. “Гран Марча” (Буюк юриш) деб номланган тадбирда иштирокчилар “Венесуэлага Николас керак!” ва “Уларни қайтаринг!” каби шиорлар ёзилган плакат ва ёзувли футболкалар билан юриш қилган.

Намойишда президентнинг ўғли, Миллий Ассамблея аъзоси Николас Мадуро Герра сўзга чиқиб, АҚШ ҳарбийларининг жорий йилнинг 3 январь кунги ҳаракатини Венесуэла суверенитетига таҳдид деб атаган. Унинг айтишича, бу воқеа мамлакат тарихида энг оғриқли ҳодиса ҳисобланади.

Маҳаллий ОАВ хабарига кўра, мазкур намойиш Мадуро ва Флоресни озод қилишни талаб қилган “глобал ҳаракатлар куни” доирасида ўтказилган. Шунга ўхшаш намойишлар дунёнинг бошқа давлатларида ҳам бўлиб ўтган.

Айни пайтда Венесуэлада вақтинчалик президент вазифасини бажараётган Делси Родригес АҚШ билан музокаралар олиб бормоқда. У мамлакатда ислоҳотлар ўтказиш, сиёсий маҳбусларни озод қилиш ва иқтисодий соҳада ўзгаришлар қилишга ваъда берган. 

Эслатиб ўтамиз, аввалроқ Дональд Трамп Венесуэла ҳаво ҳудуди яқин вақт ичида очилишини маълум қилганди. Трампнинг сўзларига кўра, у Венесуэланинг вақтинча раҳбари ҳисобланган Делси Родригес билан телефон орқали суҳбатлашган ва унга АҚШ Венесуэла устидаги барча тижорий парвозлар учун ҳаво ҳудудини очмоқчи эканини билдирган.

Жамшидбек Амиров