Винисиус Роналдунинг Чемпионлар Лигасидаги рекордини такрорлади

Испаниянинг “Реал Мадрид” жамоаси ҳужумчиси Винисиус Жуниор кеча, 11 март куни Чемпионлар лигасида энг кўп голли узатма бериш бўйича клуб рекордини такрорлади. Бу ҳақда “Get Football” нашри хабар берди.

Бразилиялик футболчи 1/8 финал босқичида “Сантьяго Бернабеу” стадионида бўлиб ўтган “Манчестер Сити”га қарши учрашувда Федерико Вальверденинг иккинчи голига ассистентлик қилди.

Шу тариқа Винисиус “қироллик клуби” сафида Чемпионлар лигасида 31 та голли узатмага муаллифлик қилди ва клубнинг аввалги рекорди соҳиби Криштиану Роналду натижасига тенглашди.

Эътиборлиси, португалиялик футболчи ушбу натижага эришиш учун 101 та ўйинда майдонга тушган бўлса, Винисиусга бунинг учун атиги 79 та учрашув етарли бўлди. 

Маълумот учун, Роналду 2009-2018 йилларда “Реал Мадрид” шарафини ҳимоя қилган. Винисиус Жуниор эса Мадрид клубига 2018 йилда қўшилган.

“Реал Мадрид” ва “Манчестер Сити” жамоалари ўртасидаги жавоб учрашуви жорий йилнинг 17 март куни Манчестер шаҳрида бўлиб ўтади.