Японияда 7,5 магнитудали зилзила содир бўлди (видео)

Кеча, 8 декабрь куни тунги вақтда Япониянинг шимолида 7,5 магнитудали зилзила содир бўлди ва оқибатда 30 киши турли даражадаги тан жароҳатларини олди. Бу ҳақда мамлакат Бош вазири Санаэ Такаичи журналистларга берган интервьюсида сўз очди.

Унинг айтишича, ҳозирча ҳалок бўлганлар ёки бедарак йўқолганлар ҳақида маълумот йўқ. 

“Одамларнинг кундалик ҳаётини давом эттиришини истардик, аммо такрорий кучли силкинишлар юз берса, дарҳол эвакуация қилишга тайёр бўлиш зарур”, дея огоҳлантирган вазир. 

Унинг таъкидлашича, бундай эҳтиёткорлик яқин бир ҳафта давомида сақланиши керак бўлади.

Зилзила 8 декабрга ўтар кечаси Япониянинг шимолий Аомори префектураси шарқида содир бўлган. Эпицентр Тинч океанида, ўчоғи 50 км чуқурликда жойлашган. Аввал маҳаллий сейсмологлар магнитудани 7,2 деб эълон қилган, кейин 7,6 га кўтарган, якунда эса 7,5 даражасини тасдиқлаган.

Силкинишлардан сўнг мамлакатнинг шарқий ва шимоли-шарқий қирғоқлари учун цунами хавфи эълон қилинди. Аомори, Ивате ва Хоккайдо префектуралари қирғоқларига 3 метр баландликдаги тўлқин келиши мумкинлиги ҳақида огоҳлантирилган. Ҳозирга келиб барча ҳудудлар учун цунами огоҳлантируви бекор қилинган, қайд этилган энг баланд тўлқин 70 см бўлган.

Шунингдек, зилзила шарқий ва шимоли-шарқий ҳудудларда темирйўл ҳаракатида узилишларга сабаб бўлган. Тезюрар поездлар ҳаракати вақтинчалик тўхтатилган. 

Бу зилзила 2025 йил бошидан бери Японияда қайд этилган энг кучли силкиниш бўлди. Бунгача энг кучлиси 9 ноябрь куни Ивате префектураси соҳилларида содир бўлган. У 6,8 магнитудали зилзила эди. Ўшанда кичик цунами кузатилган, аммо қурбонлар бўлмаган.

Эслатиб ўтамиз, жорий йилнинг 7 декабрь куни Ўзбекистоннинг бир қанча ҳудудларида зилзила содир бўлганди.