Европада Беларусь жосуслик тармоғи йўқ қилинди

Чехия разведка хизматлари Руминия ва Венгрия разведка хизматлари билан ҳамкорликда Европада фаолият юритаётган Беларусь жосуслик тармоғини аниқлади ва йўқ қилди. Бу ҳақда 8 сентябрь куни Чехия хавфсизлик ва ахборот хизмати (BIS) хабар берди.

Чехия разведка хизматлари “дипломатик ниқоб остида ишлайдиган разведкачи” деб атаган Беларусь элчихонаси ходими Прагада персона "нон грата" деб эълон қилинди ва Молдова разведка хизматларининг Минскда ишлагани айтилган собиқ юқори мартабали ходими Руминияда ҳибсга олинди.

BIS ҳисоботига кўра, Европадаги разведка тармоғи агентлар ва разведка маълумотларини йиғиш тармоғини яратишга интилган Беларусь Давлат хавфсизлик қўмитаси томонидан яратилган.

“BIS ва Чехия дипломатиясига жосуслик билан шуғулланган Беларусь агентларини фош қилгани ва жазолагани учун миннатдорчилик билдираман. Биз агентларнинг мамлакатимизда кезиб юришига йўл қўймаймиз ва биз Чехияни ҳимоя қиламиз”, деди Чехия Ташқи ишлар вазири Ян Липавский Х ижтимоий тармоғида.

72 соат ичида Чехияни тарк этишга буйруқ берилган дипломатнинг исми ошкор этилмаган.

Беларусь жосуслик тармоғининг иштирокчилари деб тахмин қилинганлар орасида Молдова разведка хизмати (SIS) раҳбарининг собиқ ўринбосари ҳам бор. “Озодлик” радиосининг Руминия хизмати уюшган жиноятчилик ва терроризмни тергов қилиш бошқармаси (DIICOT) ходимлари томонидан исми ошкор қилинмаган 47 ёшли молдовалик юқори мартабали зобит ҳибсга олинганини тасдиқлади. У Беларусь фойдасига жосусликда айбланмоқда ва давлатга хиёнатда гумон қилиниб, тергов қилинмоқда.

Гумонланувчи сўнгги бир йил ичида Будапештда икки марта КГБ зобитлари билан учрашган. BIS'нинг қайд этишича, Беларусь агентлари дипломатларнинг Европа бўйлаб эркин ҳаракатланиши имкониятидан фойдаланган. Шу муносабат билан Чехия махсус хизмати раҳбари Михал Куделка Чехиянинг “Россия ва Беларусдан аккредитациядан ўтган дипломатларнинг Шенген зонасида ҳаракатланишини чеклаш тўғрисида”ги таклифини эслатди. Бу таклиф Европа Иттифоқи даражасида муҳокама қилинмоқда, аммо бу борада консенсусга ҳали эришилгани йўқ.