Европадаги қатор аэропортларга киберҳужум уюштирилди

Бугун, 20 сентябрь куни рўйхатдан ўтиш ва самолётга чиқиш тизимларини тақдим этувчи сервисга уюштирилган киберҳужум бир нечта йирик Европа аэропортлари ишини издан чиқарди. Уларнинг орасида Бельгиянинг Брюссель ва Германиянинг Берлин шаҳри аэропортлари, шунингдек, Лондоннинг Хитроу аэропорти бор. Бу ҳақда “Reuters” хабар берди.

Дунё бўйлаб кўплаб авиакомпанияларга рўйхатдан ўтиш ва чиқиш тизимини тақдим этувчи Американинг "Collins Aerospace" компанияси Хитроу маъмуриятига “техник муаммо” юзага келганини билдирган. Аэропорт маъмурияти йўловчиларни рейсларнинг кечикиши ҳақида огоҳлантирган.

Брюсселдаги Завентем аэропортида ҳам кечикишлар ва ҳаттоки рейсларнинг бекор қилиниши мумкинлиги айтилган. Аэропорт ходимлари ҳозирча рўйхатдан ўтказиш ва самолётга чиқишни фақат қўлда амалга ошираётганини қайд этган. Йўловчиларга эса парвоз статусини олдиндан текшириш тавсия қилинган.

Берлиннинг Бранденбург аэропорти маъмурияти эса "Collins Aerospace"га қилинган киберҳужум оқибатида билвосита зарар кўрганини маълум қилган. Аэропорт ходимлари муаммодан кеча, 19 сентябрь куни кечқурун хабар топган ва ҳозиргача уни бартараф этиш устида ишламоқда.

“Шу пайтгача бизга омад кулиб боқди: кечикишлар нисбатан кам бўлди, аммо рейслар бекор қилинмади ва йирик носозликлар кузатилмади”, дейди Берлин аэропорти вакили.

Аэропорт рўйхатдан ўтиш ва юк топшириш жойларида навбатлар бўлиши мумкинлиги ҳақида огоҳлантириб, йўловчиларга имкон қадар бу хизматлардан онлайн фойдаланишни тавсия қилган.

Маълумот учун, Лондоннинг Хитроу, Берлиннинг Бранденбург ва Бельгиянинг Завентем аэропортлари ўз мамлакатларида энг банд ҳисобланади. Хитроу дунёдаги энг гавжум ўн аэропорт қаторига киради. Ўтган йили Лондонинг ушбу аэропорти рекорд даражадаги 83,9 миллион йўловчига хизмат кўрсатган.

Эслатиб ўтамиз, аввалроқ cўнгги 12 ой ичида Германия иқтисодиёти маълумотлар ўғирланиши, саноат жосуслиги ва саботажлар оқибатида 289,2 миллиард евро зарар кўргани ҳақида хабар берилган эди.