Зеленский мағлубиятни тан олиши керак – Трамп

Украина Президенти Владимир Зеленский мағлуб бўлмоқда ва у бу воқеликни борича қабул қилишни бошлаши керак. Бу ҳақда АҚШ Президенти Дональд Трамп “Politico” нашрига берган интервьюсида сўз очди.

Трампнинг фикрича, ҳозир устунлик Россия томонида, чунки “одатда куч ғолиб келади”, ва Зеленский ўзини қўлга олиб, реал вазиятни қабул қилишни бошлаши керак.

“Зеленский ишга киришиши ва воқеликни борича қабул қилишни бошлаши керак, чунки у мағлуб бўлмоқда”, деган Оқ уй раҳбари. 

Журналист “Украина урушни ютқаздими?” деб сўраганда, Трамп Киев жуда кўп ҳудудларни йўқотганини эслатиб ўтган. 

“Мен 10 ой олдин, яъни Оқ уйга қайтишимдан олдин ҳам улар қирғоқнинг бир қисмини, катта қисмини йўқотган эди. Хариталарга қаранг. Ҳозир бу ҳудудлар янада кўпроқ. Улар кўп ерларини йўқотди ва бу улар йўқотган ерлар жуда яхши ҳудуд эди. Буни ғалаба деб аташ қийин, албатта”, дея қўшимча қилган Трамп. 

Европа давлатларининг Украинани қўллаб-қувватлаш бўйича позициясига тўхталар экан, Трамп Европани ҳам қоралаган. 

“Агар улар давом эттиришга қарор қилсалар – давом эттиришсин. Лекин умуман олганда, Европа етакчилари ўз ишини унчалик яхши бажармаяпти”, деган Америка Президенти. 

Эслатиб ўтамиз, Трамп ушбу интервьюси давомида Украинада янги сайловлар ўтказиш вақти келганини айтганди. Трампга кўра, Украинада анчадан буён сайловлар ўтказилмагани, мамлакатда демократия йўқлигидан далолат.