Икки давлат Президенти Ўзбекистонга келяпти

2025 йилнинг жорий ҳафтасида Сербия Президенти Александр Вучич ва Финляндия Президенти Александр Стубб Ўзбекистонга келади. Бу ҳақда Президент матбуот котиби Шерзод Асадов хабар берди.

Қайд этилишича, бугун, 27 октябрь куни Шавкат Мирзиёев жорий йилда иқтисодиётда кутилган натижалар ва 2026 йилга мўлжалланган асосий макроиқтисодий кўрсаткичлар юзасидан кенгайтирилган йиғилиш ўтказади.

Куннинг иккинчи ярмида Президент АҚШ Президентининг Жанубий ва Марказий Осиё бўйича махсус вакили Сержио Гор бошчилигидаги делегацияни қабул қилади.

Маълумки, Ўзбекистон тарихий тадбир – UNESCO Бош конференциясининг 43-сессиясини қабул қилмоқда. Президент Самарқандга ташриф буюриб, илк бор Париж шаҳридан ташқарида ўтказилаётган анжуманнинг очилишида иштирок этади, маданият, илм-фан ва таълим соҳаларидаги халқаро ҳамкорликни мустаҳкамлаш бўйича ташаббусларни илгари суради ҳамда қатор икки томонлама учрашувлар ўтказади.

Бундан ташқари, жорий ҳафтада Ўзбекистонга Сербия Президенти Александр Вучич ва Финляндия Президенти Александр Стубб расмий ташриф билан келади. Саммитлар доирасида олий даражадаги музокаралар ўтказилиб, икки томонлама ҳамкорликни янада кенгайтиришнинг долзарб масалалари муҳокама қилинади.

Эслатиб ўтамиз, аввалроқ Ўзбекистон ва Бирлашган Миллатлар Ташкилоти 2026–2030 йилларга мўлжалланган янги ҳамкорлик дастурини имзолаганди.