Indoneziyada vulqon otilishi oqibatida sayyohlar halok bo‘ldi

Bugun, 8 may kuni ertalab Indoneziyadagi Dukono vulqoni otilishi oqibatida uch sayyoh halok bo‘ldi. Bu haqda BBC xabar berdi.

Qayd etilishicha, Indoneziya vulqonshunoslik tadqiqot markazi 2024 yil dekabridan beri sayyohlar va alpinistlarga Dukono tog‘i krateri atrofidan 4 km masofada harakatlanmaslikni tavsiya qilgan. Chunki bu hududda vulqon otilishi, kul va toshlarning uchib chiqishi xavfi mavjud. Shunga qaramay, bu ogohlantirishlar sayohatchilarni 1335 metr balandlikdagi tog‘ga chiqishdan to‘xtata olmagan. Qutqaruvchilar vulqon otilishidan keyin bedarak yo‘qolgan 20 kishilik sayyohlar guruhidan barcha tirik qolganlarni topgan. Ko‘pchilik tog‘dan evakuasiya qilingan, ammo jasadlarni topishga yordam berish uchun ikki qutqaruvchi qolgan. Shimoliy Halmaxera politsiyasi boshlig‘i Erlixson Pasaribu so‘zlariga ko‘ra, o‘lim haqida sayohatchilar bilan birga bo‘lganlar xabar bergan.

Bundan tashqari, Indoneziyaning milliy tabiiy ofatlarni boshqarish agentligi o‘z bayonotida kamida besh kishi jarohat olganini ma’lum qilgan. Rasmiylarning so‘zlariga ko‘ra, bir necha soat oldin Dukonotog‘ining otilishi cho‘qqisidan 10 km balandlikdagi kul ustunini ko‘targan. Mahalliy amaldorning aytishicha, ular vulqon otilishidan keyin ikki singapurlik sayyoh halok bo‘lgani haqida ma’lumot olgan.

Ma’lumot uchun, Dukono Indoneziyaning eng faol vulqonlaridan biri bo‘lib, sayohatchilar va sayyohlar orasida mashhur. Indoneziya vulqonshunoslik tadqiqoti ma’lumotlariga ko‘ra, Dukono vulqoni mart oyi oxiridan beri qariyb 200 marta otilgan. Hozirda u agentlikning uch darajali vulqon ogohlantirish tizimining ikkinchi darajasida ro‘yxatga olingan, bu esa faollikning kuchayganligini va ehtiyot bo‘lish zarurligini ko‘rsatadi.

Rasmiylar hali o‘lim holatlarini tasdiqlamagan, chunki qutqaruvchilar hali ham vulqonda qolib ketgan sayyohlarni qidirmoqda.

Eslatib o‘tamiz, avvalroq Indoneziyaning Sharqiy Yava provinsiyasida Semeru vulqonining kamida to‘rtta otilishi qayd etilgan edi.

Zarnigor Xudoyberdiyeva