Isroildagi AQSH elchixonasi Eron zarbasidan zarar ko‘rdi

AQSHning Tel-Avivdagi elchixonasi Eron tomonidan berilgan raketa zarbalari oqibatida kichik zarar ko‘rdi, hech kim jabrlanmadi. Bu haqda Qo‘shma Shtatlarning Isroildagi elchisi Mayk Xakabi o‘zining X sahifasida ma’lum qildi.

Uning so‘zlariga ko‘ra, bugun AQSHning Isroildagi elchixonasi va konsullik idoralari ishlamaydi.

“AQSHning Isroildagi elchixonasi va konsullik o‘z joyida boshpana berish tartibi davom etayotgani sababli bugun yopiq qoladi. Tel-Avivdagi elchixona binosi yaqinida Eronning raketa zarbalari kichik zarar keltirdi, ammo AQSH xodimlari orasida qurbonlar yo‘q”, deb yozadi elchi.

Davlat departamenti bir kecha-kunduzda Amerika Qo‘shma Shtatlarining Quddusdagi elchixonasi hamda Quddus va Tel-Avivdagi konsullik bo‘limlari mavjud vaziyat hamda mumkin bo‘lgan xavfsizlik xavflari sababli 16 iyun kuni yopilishini bildirgan maslahatnoma chiqardi. Isroildagi barcha AQSH hukumati xodimlari va ularning oila a’zolaridan Isroil Mudofaa kuchlarining tavsiyalariga muvofiq keyingi ogohlantirishgacha uyda qolishlari so‘ralgan.

Eron Sog‘liqni saqlash vazirligi ma’lumotlariga ko‘ra, Isroil hujumlari boshlanganidan beri 220 dan ortiq odam halok bo‘lgan, ularning 90 foizi tinch aholi vakillaridir. Eronning bir kechada uyushtirgan raketa hujumlari oqibatida Isroilda uch kishi halok bo‘ldi, 70 ga yaqin kishi jarohatlandi.

Zarbalar bir nechta yirik shaharlarga urildi: Tel-Avivda turar-joy binolari vayron bo‘ldi, harbiy bazaga zarar yetkazildi va raketalardan biri AQSH elchixonasi yaqiniga tushib, kichik zarar yetkazdi. Hayfada elektr stansiyasi va neftni qayta ishlash zavodi shikastlangan.

Tehron Isroil raketalarini bir-biriga qarshi ishlashga majburlab, Isroilning havo hujumidan mudofaa tizimini “buzgan”ini da’vo qilmoqda. Eron manbalariga ko‘ra, “havo-havo” rusumli raketalar dushman mudofaasiga qisman kirib borish uchun qo‘llangan bo‘lishi mumkin. Isroil bu da’volarga hozircha izoh bermadi.

“Military Watch” ma’lumotlariga ko‘ra, Amerika havo bazalaridan yonilg‘i quyadigan samolyotlarni keng ko‘lamli olib chiqish boshlangan. Tahlilchilar bu harakatlarni Isroil va Eron o‘rtasidagi ziddiyatning kuchayishi bilan izohlamoqda.

Eslatib o‘tamiz, avvalroq Isroil Eron Tashqi ishlar vazirligiga hujum qilgani haqida xabar berilgandi.