Latviya Rossiya va Belarusga avtobus qatnovlarini butunlay to‘xtatmoqchi

Latviya Transport vazirligi Rossiya va Belarusga barcha avtobus qatnovlarini, shuningdek, mamlakat hududi orqali tranzit tashishni taqiqlovchi tuzatishlarni ishlab chiqdi. Bu haqda “Delfi” xabar berdi. 

Hozirgi vaqtda Latviya-Rossiya va Latviya-Belarus chegaralari orqali xalqaro nomuntazam avtobus qatnovlariga taqiq allaqachon amal qilmoqda. Yangi tuzatishlar esa cheklovlarni muntazam reyslarga ham tatbiq etadi. Vazirlik tushuntirishicha, qoidalar tasdiqlangach, davlat Avtotransport direksiyasi (ATD) ma’muriy hujjatlar orqali konkret tashuvchilarga berilgan ruxsatnomalarni bekor qilishi mumkin bo‘ladi. Idoraning bildirishicha, bu cheklovlar Latviya Konstitutsiyasiga mos keladi va demokratik jamiyatda o‘zini oqlaydi.

“Davlat xavfsizlik xizmatining 2025 yildagi faoliyati bo‘yicha hisobotida bayon etilgan xulosalarga ko‘ra, Belarus va Rossiya bilan transport aloqasi mavjudligi milliy xavfsizlikka tahdid soluvchi omillarni amalga oshirishga ob’ektiv ravishda yordam beradi deb hisoblash uchun asoslar bor. Belarus va Rossiyaga muntazam reyslarning mavjudligi, boshqa sayohat imkoniyatlari bilan bir qatorda, Latviya fuqarolari uchun ta’sir o‘tkazish va yollash holatlariga duch kelish xavfini oshiradi”, deyiladi vazirlik izohida.

Vazirlik tashuvchilar jiddiy zarar ko‘rishi mumkinligini tan olmoqda. Tuzatishlar annotatsiyasida Ecolines brendi ostida faoliyat yurituvchi Norma-A tashuvchisining ma’lumotlari keltirilgan. Kompaniya Riga – Sankt-Peterburg va Riga – Moskva yo‘nalishlari bo‘yicha to‘g‘ridan to‘g‘ri daromad yo‘qotishini yiliga taxminan 4 million yevro deb baholamoqda. Avtobuslar parkining bekor turib qolishi tufayli ko‘riladigan qo‘shimcha zarar esa yiliga yana 2 million yevroni tashkil etishi mumkin.

Ushbu o‘zgarishlar kuchga kirishi uchun ular Latviya Vazirlar Mahkamasi tomonidan tasdiqlanishi kerak.

Bungacha mamlakat rasmiylari tashuvchilarga Rossiya va Belarusga muntazam reyslarni amalga oshirish uchun litsenziyalarni uzaytirishni to‘xtatgan, biroq ruxsatnomalarning bir qismi hali ham amal qilmoqda. Xususan, Ecolines hozircha Riga – Moskva reysini 2027 yil 9 yanvargacha amalga oshirishi mumkin. Agar yangi qoidalar kuchga kirsa, litsenziyalar muddatidan oldin bekor qilinishi mumkin.