NASA Quyoshni misli ko‘rilmagan darajada batafsil suratga oldi (video)

NASA’ning PUNCH missiyasi Quyoshning misli ko‘rilmagan tasvirlarini oldi. Bu haqda NASA o‘zining rasmiy saytida xabar berdi.

Qayd etilishicha, kosmosda bir-biridan taxminan 13 ming kilometr uzoqlikda joylashgan to‘rtta kichik sun’iy yo‘ldosh bitta “virtual teleskop” sifatida ishlamoqda. Ushbu sun’iy yo‘ldoshlar birinchi marta Quyoshning tashqi atmosferasi — toj va quyosh shamolini bir butun holatda suratga olishga muvaffaq bo‘lgan.

Janubi-g‘arbiy tadqiqot instituti (SwRI) rahbarligida amalga oshirilayotgan PUNCH missiyasi ishga tushirilganidan atigi bir yil o‘tib muhim natijalarga erishgan. Xususan, noyabr oyida ushbu tizim AQSH hududi bo‘ylab rangli qutb nurlarini yuzaga keltirgan kuchli quyosh bo‘ronini kuzatgan. Bu ma’lumotlar kosmik ob-havoni yaxshiroq tushunish va oldindan bashorat qilishga yordam beradi.

Sun’iy yo‘ldoshlar Quyoshdan ajralib chiqib kosmosga tarqaladigan ulkan plazma bulutlari (koronal massa otilishlari) va quyosh shamoli qanday harakatlanishini batafsil ko‘rsatib bermoqda. Shuningdek, PUNCH boshqa teleskoplar ilg‘ay olmaydigan kuchsiz va noyob kometalarni ham aniqlay olgan. Ular orasida yulduzlararo kelib chiqishga ega bo‘lgan va qariyb 40 kun davomida kuzatilgan kometa ham bor.

“Missiyaning bosh tadqiqotchisi doktor Kreyg DeForest bu tasvirlar Quyosh tizimidagi o‘rnimizni yanada yaxshiroq anglashga yordam berishini aytdi. Uning so‘zlariga ko‘ra, Quyosh faolligi fonida Oy, sayyoralar va kometalarning harakatini ko‘rish koinotdagi yaqin atrofimizga noyob nazar tashlash imkonini beradi”, deyiladi xabarda.

Bu tasvirlar ilg‘or texnologiyalar yordamida olingan. Sun’iy yo‘ldoshlardagi maxsus kameralar Quyosh nurini trillion martadan ortiq kamaytiradi, shu orqali juda kuchsiz quyosh shamolini ko‘rish mumkin bo‘ladi. Keyin esa Yerdagi tizimlar ortiqcha yulduz nurini deyarli butunlay olib tashlab, kosmosga taralayotgan quyosh zarralarini aniq ko‘rsatadi.