Nazarboyevning qizlari “Real”ning o‘yiniga bormoqchi

Qozog‘istonning birinchi prezidenti Nursulton Nazarboyev oilasining ayrim a’zolari joriy yilning 30 sentyabr kuni Olmaota markaziy stadionida bo‘lib o‘tadigan “Qayrat” – “Real” o‘rtasidagi futbol o‘yiniga tashrif buyuradi. Bu haqda “Ertenmedia” xabar berdi.

Qayd etilishicha, birinchi prezident Nursulton Nazarboyevning to‘ng‘ich qizi Darig‘a Nazarboyeva avgust oyi oxirida Olmaotaga kelgan. Ayni paytda, uning boshqa qizi Aliya Nazarboyevaning aytishicha, yaqin kunlarda ularga Markaziy saylov komissiyasining sobiq raisi Berik Imashevning qizi Aidaga uylangan birinchi prezidentning nabirasi Nurali Aliyev ham qo‘shiladi. “Qayrat” futbol klubi egasi Qayrat Boranbayev bo‘lib, uning qizi Nazarboyevning nabirasiga turmushga chiqqan. Qayrat Boranbayev muntazam ravishda Qozog‘istonning eng boy biznesmenlari qatorida turadi. “Forbes” ma’lumotlariga ko‘ra, 2021 yil holatiga ko‘ra, uning boyligi 590 million dollarga baholangan.

2023 yilning martida Ostona sudi Boranbayevni “KazTransGaz”ga tegishli 14,5 milliard tengeni o‘zlashtirish va yuvishda ayblab, sakkiz yilga ozodlikdan mahrum qilgan edi. Keyinroq apellyatsiya sudi uning jazo muddatini ikki yilga qisqartirdi. Ayni paytda Darig‘a Nazarboyevaning sobiq qaynotasi o‘sha yilning noyabr oyida qamoqdan ozod qilingan edi. Sud Qayrat Boranbayev “davlatga yetkazgan zararni to‘liq qoplagani, tergov bilan faol hamkorlik qilgani va qilmishidan pushaymon bo‘lgani”ni inobatga olgan.

Nashrning qayd etishicha, Nazarboyevlar oilasining mamlakatga bo‘lgan qarashlari Prezident Qosim-Jomart To‘qayevning so‘nggi murojaatida Aktivlarni qaytarish bo‘yicha qo‘mita nomini Sarmoyadorlarni himoya qilish qo‘mitasi deb o‘zgartirish va futbol klublarini xususiylashtirish kerakligi haqidagi fikrlarga mos keladi. Majlis deputati Nortoy Sarsengaliyevga ko‘ra, 2025 yilda Qozog‘iston futbol klublarini moliyalashtirish uchun 31,8 milliard tenge sarflangan.

To‘qayev 8 sentyabr kuni xalqqa yillik murojaatida futbol klublarini xususiylashtirishni tezlashtirishni buyurgandi. Uning qayd etishicha, Qozog‘istonning to‘rtta klubi allaqachon taniqli tadbirkorlar timsolida o‘z egalarini topgan.

Qozog‘istonning “Qayrat” futbol klubi UEFA Chempionlar ligasining umumiy bosqichidagi o‘z maydonidagi o‘yinlarga chipta sotish tartibi, narxi va muddatlarini e’lon qilgandi. 

Xususan, “Qayrat” – “Real Madrid” uchrashuviga chiptalar joriy yilning 23 sentyabr kuni soat 17:00 da sotuvga chiqadi. Uning narxi 30 ming tengedan (taxminan 690 ming so‘m) boshlanadi. Eng qimmat chipatalar esa 250 ming tenge (taxminan 5 mln 730 ming so‘m). Bir kishiga 2 tadan ortiq chipta sotilmaydi. Shuningdek, chipta xarid qilishda pasport ma’lumotlari tekshiriladi.

Ma’lumot uchun, “Qayrat”ning “Real Madrid”ga qarshi o‘yini joriy yilning 30 sentyabr kuni bo‘lib o‘tadi. Bahs Olmaota shahridagi “Markaziy” stadionida o‘tkaziladi.