Neymar 3,5 yildan so‘ng ilk xet‑trigini qayd etdi

“Santos”ning 33 yoshli hujumkor yarimhimoyachisi Neymar shifokorlar tavsiyasiga ko‘ra, 2025 yil yakuniga qadar maydonga tushmasligi kerak bo‘lsa-da, bugun, 4 dekabr kuni ertalab Braziliya chempionatining 37-turida “Juventude”ga qarshi o‘yinda maydonga tushib, 3 yarim yil ichidagi birinchi xet-trigini nishonladi.

 Neymar barcha gollarini ikkinchi bo‘limda 56, 65 va 73-daqiqalarda kiritdi. Uchinchi gol penaltidan kiritildi. Bu xet‑trik braziliyalik futbolchi uchun 2022 yil aprelidan beri birinchi bo‘lib, o‘sha paytda u PSJ safida “Klermon” darvozasiga uchta gol urgan edi. 

Forvard o‘zining golli seriyasini ketma-ket uchta o‘yinga yetkazdi. Shu davr mobaynida u beshta gol urib, mavsumdagi eng yaxshi individual seriyalaridan birini qayd etdi.

Joriy Braziliya chempionatida Neymar 19 o‘yinda 8 ta gol urib, oldingi jarohatlardan keyin asta-sekin barqaror formaga qaytdi.

Neymarning golli seriyasi ketma-ket uchta o‘yinda davom etib, beshta golga yetdi. 2025 yilgi mavsumda Neymar “Santos” tarkibida 29 ta o‘yinda maydonga tushib, 11 ta gol va 4 ta golli uzatmani amalga oshirdi.

Eslatib o‘tamiz, avvalroq futbolchi meniskusiga jarohat yetkazgani va mavsumni vaqtincha tark etishi mumkinligi haqida xabarlar tarqalgan edi, biroq Neymar keyinchalik jarohat jiddiy emasligini ma’lum qilib, maydonga qaytdi.