Putinga yuz minglab dron ishlab chiqarishni va’da qilgan shaxs hibsga olindi

2025 yilning yanvarida Rossiya Prezidenti Vladimir Putinga yiliga 300 mingtagacha dron ishlab chiqarish haqida hisobot bergan “Transport buduego” kompaniyasining sobiq bosh direktori Yuriy Kozarenko o‘ta yirik miqdordagi firibgarlikda ayblanib hibsga olindi. Bu haqda “Kommersant’” nashri xabar berdi.

Nashrning yozishicha, avvalroq Belgorodning Sverdlovsk tuman sudi uni 28 iyungacha qamoqqa olish haqida qaror chiqargan, 8 may kuni esa Belgorod viloyat sudi advokatning apellyatsiya shikoyatini rad etgan. Tergovni Belgorod viloyati IIB olib bormoqda.

“Avia.pro” ma’lumotlariga ko‘ra, jinoyat ishi uchuvchisiz uchish qurilmalarini ishlab chiqarish bo‘yicha davlat mudofaa buyurtmasini bajarish uchun ajratilgan taxminan 70 million rublni o‘zlashtirish bilan bog‘liq. Tergovning fikricha, Kozarenko mablag‘larni maqsadsiz sarflashga aloqador: pullar amalda ishlarni bajarmagan “do‘st” tashkilotlar xizmatlari uchun to‘lov sifatida o‘tkazilgan. Bundan tashqari, “Transport buduego” kompaniyasi 750 ta vertikal ko‘tarilish va qo‘nish xususiyatiga ega dronlarni seriyali ishlab chiqarish uchun 4,5 milliard rubl miqdorida davlat subsidiyasiga ega bo‘lgan, biroq subpudratchi ishlarning 80 foizini shartnoma muddati tugaganidan bir yil o‘tibgina bajargan, bu esa tekshiruvga sabab bo‘lgan.

Kozarenko Belgorod viloyatidagi qishloqlardan biridan chiqqan, Belgorod davlat universitetining “moliya” mutaxassisligini tamomlagan. 2012 yildan boshlab “Efko” guruhida ishlab, innovatsiya markazi rahbari darajasigacha ko‘tarilgan. 2022 yilda uchuvchisiz tizimlarni ishlab chiqarish bilan shug‘ullanuvchi “Transport buduego” kompaniyasiga rahbar bo‘lgan. 2023 yilda kompaniya “Tolyatti” maxsus iqtisodiy zonasida zavodning birinchi bosqichini ishga tushirgan (investitsiyalar taxminan 7 mlrd rubl), 2024 yil oxiriga kelib esa oyiga 100 ta dron chiqarilayotgani va buni 250 taga yetkazish rejalari haqida bayonot bergan.

2025 yil yanvarida Kozarenko Putinni Samaradagi korxonada kutib olib, unga loyihalash va yig‘ish maydonchalarini namoyish qilgan hamda yiliga 300 mingtagacha dron, jumladan “Geran”larni ishlab chiqarish imkoniyati borligi haqida faxr bilan ma’lum qilgan. O‘shanda u quvvati yiliga 20 MVt·soat bo‘lgan litiy-ionli akkumulyatorlar ishlab chiqarish sexining ochilishida ham ishtirok etib (investitsiyalar 1,3 mlrd rubl), “millionlab ta’lim dronlari va yuz minglab og‘ir fuqaroviy dronlarni” akkumulyatorlar bilan ta’minlashga va’da bergan.